თავისუფალი დემოკრატების ყოფილი ლიდერი და საქართველოს ყოფილი ელჩი გაეროში, ირაკლი ალასანია რუსულ ტელეკომპანიას - RAIN ვიტალი ჩურკინზე ესაუბრა. ალასანიამ მწუხარება გამოთქვა მისი სიკვდილის გამო და აღნიშნა, რომ ჩურკინი პროფესიონალი დიპლომატი და გაეროში ძალიან პატივსაცემი ადამიანი იყო:

"რუსეთ-საქართველოს ურთიერთობებში ძალიან მძიმე დღეები და თვეები იყო. ჩვენ ფაქტობრივად ერთად დავიწყეთ მუშაობა გაეროში 2006 წელს. გულწრფელად შემიძლია გითხრათ, რომ ეს ადამიანი იყო ძალიან პროფესიონალი დიპლომატი. მას ჰქონდა ძალიან მაღალი კვალიფიკაცია და ჩვენ ვიყავით მოწინააღმდეგეები, რადგან რუსეთის მხრიდან ძალიან აგრესიული ომი მიმდინარეობდა საქართველოს წინააღმდეგ. ჩვენ, რა თქმა უნდა, ბოლომდე ვიბრძოდით. მე ჩემს სამშობლოს ვიცავდი ის თავისი ხელისუფლების მითითებებს ასრულებდა. ამავე დროს მე ვხედავდი, რომ მას გული შესტკიოდა ქართულ-რუსული ურთიერთობის პრობლემებზე. ჩვენ მუდმივად ვცდილობდით ამ სიტუაციიდან გამოსვლას, თუმცა, რა თქმა უნდა, ესარ იყო შესაძლებელი. მე მასში ვხედავდი არა მხოლოდ მოწინააღმდეგეს, არა მხოლოდ ოპონენტს, არამედ - ადამიანს."

გაეროში რუსეთის მუდმივი წარმომადგენელი, ვიტალი ჩურკინი, 20 თებერვალს გარდაიცვალა. ჩურკინი ელჩის თანამდებობაზე 2006 წლის 8 აპრილიდან მუშაობდა.