საქართველოს პარლამენტის თავმჯდომარე ირაკლი კობახიძე ამერიკელ კონგრესმენებს შეხვდა. დღეს, პარლამენტი თბილისში ამერიკის შეერთებული შტატების კონგრესის დელეგაციას მასპინძლობს.

ტელეკომპანია რუსთავი 2-ის თარგმანის მიხედვით, კონგრესის წევრმა პიტერ როსკამმა განაცხადა, რომ ისინი საქართველოს ტერიტორიული მთლიანობისა და სუვერენიტეტის მიმართ, აშშ-ს მხადაჭერის გასაძლიერებლად ჩამოვიდნენ:

"ჩვენ ვაღიარებთ, რომ არსებობს ზეწოლა ავტორიტარული რეჟიმებისგან და ამ ფონზე ძალიან მნიშვნელოვანია გადაწყვეტილებები, რომლებსაც საქართველო იღებს, რათა წინ წაიწიოს და შეინარჩუნოს დემოკრატიული პრინციპები. ასევე, გააგრძელოს დასავლურ დემოკრატიასთან ინტეგრაცია. ჩვენ აქ ვართ როგორც პარტნიორები და მეგობრები. ასევე, ძალიან ვაფასებთ საქართველოს ერთგულებას სამხედრო ოპერაციებში, განსაკუთრებით ავღანეთში".

პარლამენტის თავმჯდომარის ირაკლი კობახიძის განცხადებით, დელეგაციის წევრთა სახელებს უკავშირდება კონგრესში 2016 წელს, საქართველოს ტერიტორიული მთლიანიბის მხარდამჭერი რეზოლუციის მიღება და უკანასკნელი წლების განმავლობაში საქართველოს ევროატლანტიკური მისწრაფებების საკითხში აშშ-ს მხადაჭერის მობილიზება.

თავმჯდომარესთან შეხვედრის შემდეგ, კონგრესის წარმომადგენლები ამჟამად საპარლამენტო უმცირესობასთან მართავენ შეხვდერას. ასევე, იგეგმება რომ შეხვდნენ კომიტეტების წარმომადგენლებს.

ოფიციალური შეხვედრების დაწყებამდე, ამერიკის შეერთებული შტატების კონგრესმენებმა, მეუღლეებთან ერთად, პარლამენტის ისტორიული შენობა დაათვალიერეს.