ყაზახეთის მოქალაქის, 26 წლის ასელ აიტპაევას საქმეზე პროკურატურამ გაუპატიურების ბრალდება კიდევ ერთ პირს, ყაზახეთის მოქალაქეს წაუყენა. როგორც უწყებაში ამბობენ, საუბარია გაუპატიურების ორ ეპიზოდზე.

გამოძიების ინფორმაციით, 2021 წლის 28-29 აპრილს, რუსთავში, ბრალდებულმა ფიზიკური ძალადობითა და ძალადობის გამოყენების მუქარით ასელ აიტპაევასთან ორჯერ დაამყარა არანებაყოფლობითი სქესობრივი კავშირი.

ყაზახეთის მოქალაქეს ბრალდება საქართველოს სისხლის სამართლის კოდექსის 137-ე მუხლის პირველი ნაწილის ორი ეპიზოდისთვის (გაუპატიურება) დაუსწრებლად წარედგინა, რაც სასჯელის სახედ და ზომად 6-დან 8 წლამდე თავისუფლების აღკვეთას ითვალისწინებს.

პროკურატურა სასამართლოს აღკვეთის ღონისძიების სახით პატიმრობის შუამდგომლობით მიმართავს.

მიმდინარე წლის 7 მაისს ასელ აიტპაევას გაუპატიურებისა და თვითმკვლელობამდე მიყვანის საქმეზე ბრალი წარედგინა კაცს, რაც სასჯელის სახედ და ზომად 8-დან 10 წლამდე თავისუფლების აღკვეთას ითვალისწინებს. მას აღკვეთის ღონისძიების სახით შეფარდებული აქვს პატიმრობა.