ჩვენს მკითხველს ახსოვს ციცქნა ქოხიდან დახსნილი 75 მახინჯაურელი ფისოს ამბავი, რომელიც აქტივისტებმა თბილისში ჯერ კიდევ ზამთარში ჩამოიყვანეს. კატები შემგროვებელს 10მ2-ში ჰყავდა მოთავსებული და მათი მდგომარეობა საკმაოდ მძიმე იყო.

ამ პერიოდში აქტივისტებმა დონაციებითა და კერძო ინიციატივების დახმარებით კატების სტერილიზაცია, მკურნალობა, მოვლა შეძლეს. 75 კატიდან 50 გაჩუქდა, 1 დაიღუპა, ხოლო 24 ცხოველს ამ დრომდე აქტივისტები საკუთარი ხარჯებითა და რესურსით უვლიან.

როგორც ერთ-ერთი აქტივისტი, ნათია ჩიქოვანი ამბობს, ფისოების შენახვის ხარჯები იწურება და თუ მათ მაისის ბოლომდე ვერ გააჩუქებენ, მათი გარეთ გაშვება მოუწევთ:

"უჰაერობა, უმზეობა, შიმშილი, ანტისანიტარია, ჩაკეტილი სივრცე — ბევრი ტანჯვა გამოიარეს ამ ცხოველებმა და თითოეული იმსახურებს ახალი, ბედნიერი ცხოვრების შანსს. 50 მათგანს ძალიან გაუმართლა და უკვე საკუთარ ახალ პატრონებთან, ბედნიერად ცხოვრობენ.. თუმცა, თუ თვის ბოლომდე დარჩენილი 22 ფისო ვერ გავაჩუქეთ, გამოსავალი ქუჩაში გაშვებაა, რადგან ყველანაირი რესურსი იწურება".

Animal Project-ის აქტივისტები იმ ადამიანებს, რომლებსაც ცხოველების აყვანა სურთ, მახინჯაურელი ფისოების შეფარებას ურჩევენ.

"წარმოუდგენელი ტკივილია ჩემთვის, ამხელა გზის გამოვლის შემდეგ მათი ქუჩაში გაშვება", — წერს ნათია ჩიქოვანი.

ასე რომ, თუ ფისოს აყვანა და თან ძალიან კეთილი საქმის გაკეთება გსურთ, შეგიძლიათ არჩევანი უმძიმესი პირობებიდან დახსნილ მახინჯაურელ ფისოებზე გააკეთოთ, რომლებიც რთული ცხოვრების გამოვლის შემდეგ მზრუნველ პატრონებს ელიან.

სანამ სრულად გაჩუქდებიან, ფისოებს თვალი ფეისბუქგვერდზე, მახინჯაურის ფისოები, შეგიძლიათ ადევნოთ, სწორედ ამ გვერდს უნდა მისწეროთ, თუ ცხოველის შინ წაყვანას გადაწყვეტთ.