დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორი, ამირან გამყრელიძე აცხადებს, რომ ვაქცინაციის საბჭო დღეს იმსჯელებს იმაზე, უნდა დაიწყოს თუ არა ქვეყანაში Sinovac-ით ვაქცინაცია ჯანდაცვის მსოფლიო ორგანიზაციის (WHO) ავტორიზაციის მიღებამდე.

კითხვაზე, შეიძლება თუ არა ავტორიზაციას არ დაველოდოთ, გამყრელიძემ ასე უპასუხა:

"არ გამოვრიცხავ ამას, რამდენადაც, რამდენიმე პარამეტრი და რამდენიმე არგუმენტი ამისთვის არსებობს, რასაც დღეს, სწორედ, საბჭოზე წარვადგენთ და საბჭომ უნდა განიხილოს".

გამყრელიძემ დაასახელა არგუმენტები, რომელთა საფუძველზეც, შესაძლოა Sinovac-ის გამოყენება ქვეყანამ მის ავტორიზაციამდე დაიწყოს.

"პირველი, ის არის ავტორიზაციის პროცესში. როგორც ჯანმრთელობის მსოფლიო ორგანიზაციის შესაბამისი პორტალი გვეუბნება, მალე იქნება განხილვა. პირველადი განხილვა მისი უკვე იყო და ჯანმრთელობის მსოფლიო ორგანიზაციამ გამოაქვეყნა კიდეც მაისის დასაწყისში თავისი მონაცემები ამასთან დაკავშირებით, შეხედულებები.

მეორე, ის, რომ იგი უკვე ავტორიზებულია 32 ქვეყანაში და დაახლოებით 160-170 მილიონი დოზაზე მეტია გამოყენებული. ის, ასევე, ძალიან ფართოდ გამოიყენება ჩვენს ირგვლივ მყოფ ქვეყნებში და რამდენიმე ევროპულ ქვეყანაში", — განაცხადა ამირან გამყრელიძემ.

საქართველოში Sinovac-ის 100 000 დოზა 30 აპრილს ჩამოვიდა. იგი ჩინეთის მთავრობის საჩუქარია.

აღსანიშნავია, რომ საქართველომ Sinopharm-ის გამოყენებაც 4 მაისს, WHO-ს ავტორიზაციის მიღებამდე დაიწყო. Sinopharm-მა ავტორიზაცია 7 მაისს მიიღო.

გაიგე მეტი: