ინტერნეტში ნანახი რომ ყველაფერი არ დაიჯერება, ეს კარგად ვიცით, თუმცა, ცდას რა უდგას წინ? არც არაფერიო, იფიქრა ბრიტანელმა ადელ ფილიპსმა მას შემდეგ, რაც ტიკტოკზე ვიდეო ნახა, როგორ გამოჩეკა ვიღაცამ მაღაზიაში ნაყიდი კვერცხიდან იხვის ჭუკი. ადელმა მაშინვე ახლომდებარე მარკეტს მიაშურა და იხვის კვერცხების მთელი ყუთი იყიდა.

მომხმარებლის გასაკვირად, ექვსიდან ერთ-ერთი კვერცხი განაყოფიერებული აღმოჩნდა. 30-დღიანი მოვლის შემდეგ, კვერცხიდან პატარა იხვი გამოიჩეკა, რომელსაც ადელმა მორისი დაარქვა.

ფოტო: Adele Phillips / Facebook

ფოტო: Adele Phillips / Faceboo

როგორც მორისის პატრონი იხსენებს, კვერცხების ყიდვის შემდეგ ისინი თბილ ადგილას მოათავსა, შემდეგ კი Amazon-დან პატარა ინკუბატორიც გამოიწერა. ადელის თქმით, იგი 10 დღის განმავლობაში ელოდა, რომელიმე კვერცხი თუ აღმოჩნდებოდა განაყოფიერებული, საბოლოოდ კი, ეჭვნარევი მოლოდინი გაუმართლდა.

27-ე დღეს იხვის ჭუკმა კვერცხის გატეხვა დაიწყო, 48 საათის შემდეგ კი იგი უკვე სამშვიდობოს იყო და ორივე ფეხით მყარად იდგა ნაჭუჭის ნატეხების გვერდით.

ფოტო: Adele Phillips / Facebook

ფოტო: Adele Phillips / Faceboo

მართალია, მორისი თავიდან ძალიან ბედნიერი ჩანდა, თუმცა, ფეისბუქჯგუფში ადელმა შეიტყო, რომ მას მეგობარი სჭირდებოდა, წინააღმდეგ შემთხვევაში, ძალიან მოიწყენდა და მარტოობას იგრძნობდა.

ამიტომ, იგი ზოომაღაზიაში წავიდა და მორისს მეგობარი, სახელად ბერილი მოუყვანა. როგორც მათი პატრონი ამბობს, თუმცაღა ბერილი სხვა ჯიშისაა და ცოტათი უფროსიც, წყვილი ახლა განუყრელია. მათ ცურვაც კი ერთად ისწავლეს.

სანამ პატარები არიან, ადელს ჭუკები სახლში ჰყავს, მოგვიანებით კი ეზოში პატარა გუბის გაკეთებას აპირებს, სადაც ისინი უსაფრთხოდ ითამაშებენ და გაერთობიან.

პატრონის თქმით, მათ სამეულს წინ ბევრი საინტერესო თავგადასავალი ელოდება.