საქართველოს აეროპორტების გაერთიანების ხელმძღვანელის, თამარ არჩუაძის განცხადებით, Wizz Air-ი, რომელიც ქუთაისის საერთაშორისო აეროპორტში ოპერირებს მაისიდან რეისებს 4 მიმართულებით აღადგენს. ეს მიმართულებებია:

  • რიგა;
  • დორტმუნედი;
  • კატოვიცე;
  • გდანსკი.

"ჩვენ ვაგრძელებთ მოლაპარაკებას ავიაკომპანიასთან და კოვიდ რეგულაციების შემცირების ფონზე შესაძლებლობას განვიხილავთ, რომ რეისებისა და მიმართულებების რაოდენობა გაიზარდოს. მინდა გაგახაროთ და გითხრათ, რომ ავიაკომპანია Wizz Air-ს მაისში ემატება რეისები რიგისა და დორტმუნდის მიმართულებით. ასევე, დაემატება კატოვიცესა და გდანსკის მიმართულებები", — განაცხადა არჩუაძემ.

მისივე თქმით, ზაფხულის სანავიგაციო სეზონზე, რეგულაციების შემსუბუქებასთან ერთად რეისების დამატება იგეგმება.

"სასიხარულოა ის ფაქტიც, რომ საქართველოს ავიაბაზრით დაინტერესებულნი არიან სხვა დაბალბიუჯეტიანი ავიაკომპანიებიც. მაგალითად 30 აპრილიდან საქართველოს მიმართულებით ოპერირება დაიწყო უკრაინულმა ავიაკომპანია Bees Airline-მ, რომელიც თბილისისა და ბათუმის საერთაშორისო აეროპორტში ახორციელებს ფრენებს, ხოლო ზაფხულში, ივლისიდან თბილისის მიმართულებით ფრენებს Eurowings-ი დაიწყებს", — აცხადებს თამარ არჩუაძე.

აეროპორტების გაერთიანებაში, ასევე, აცხადებენ, რომ ქუთაისის საერთაშორისო აეროპორტში რეგულარული რეისების განხორციელება აქტაუდან ქუთაისის მიმართულებით ყაზახურმა დაბალბიუჯეტიანმა ავიაკომპანია FlyArystan-მა დაიწყო.

აქტაუ-ქუთაისი- აქტაუს საჰაერო ხაზზე FlyArystan-მა პირველი რეისი 4 მაისს შეასრულა. აქტაუდან ჩამოსული მგზავრებისთვის ქუთაისის საერთაშორისო აეროპორტში საქართველოს აეროპორტების გაერთიანების ხელმძღვანელი თამარ არჩუაძე და FlyArystan-ის მმართველი დირექტორი ადრიან ჰამილტონ მანსი დახვდნენ.

აეროპორტების გაერთიანების ცნობით, მგზავრებს საქართველოს აეროპორტების გაერთიანებისა და DMO IMERETI-ს ორგანიზებით სიმბოლური საჩუქრები დაურიგდათ.

FlyArystan-ი ყაზახეთიდან საქართველოში 3 მიმართულებით იფრენს. ესენია: ატირაუ, აქტაუ და ნურ-სულთანი.