აზოტელების პროტესტის გამო, რუსთავის აზოტის მუშაობა გაჩერებულია. ქარხნის თანამშრომლების თქმით, არ იტვირთება ტრაილერები, პროდუქცია არ გადის.

"საწარმო გაჩერებულია. ერთადერთი ჩვენი კეთილი ნება იყო, ჟანგბადი არ გაგვეჩერებინა. მუშაობას აგრძელებს ერთადერთი საწარმო, ჟანგბადი მუშაობს ისევ და ისევ ამ კოვიდ ვითარებიდან გამომდინარე, რათა ჩვენი მოსახლეობა არ დავაზარალოთ.

ვერაფერი მივიღეთ გუშინდელი შეხვედრიდან. დაგვპირდნენ ჩვენი დეპუტატები მოსვლას და ველოდებით ბატონ ირაკლი პეტრიაშვილს", — უთხრა ფორმულას ქარხნის ერთ-ერთმა თანამშრომელმა, ლევან სუხიშვილმა.

მათივე თქმით, გუშინ, 28 აპრილს გამართული მოლაპარაკება უშედეგოდ დასრულდა.

რუსთავის აზოტში On.ge-ს დაუდასტურეს, რომ ქარხნის მუშაობა წუხელ გაჩერდა. რაც შეეხება გაფიცულების მთავარ მოთხოვნას ხელფასების 50%-იან ზრდასთან დაკავშირებით, აცხადებენ, რომ აღნიშნული მოთხოვნის დაკმაყოფილება შეუძლებელია.

რუსთავის აზოტის თანამშრომლები ხელფასების 50%-ით გაზრდის მოთხოვნით 27 აპრილს გაიფიცნენ.

საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირი მიიჩნევს, რომ აზოტელთა მოთხოვნა ხელფასების მატებასთან დაკავშირებით აბსოლუტურად სამართლიანია და სრულ მხარდაჭერას და მათ პროტესტს სრულ სოლიდარობას უცხადებს, კომპანიას კი მოუწოდებს, რომ ხელფასების ზრდის საკითხი სასწრაფოდ განიხილოს და დადებითად გადაწყვიტოს.

გაფიცულებს მხარს უჭერს პროფკავშირების ახალგაზრდული მოძრაობაც. ისინი დღეს, 29 აპრილს აზოტელების აქციას შეუერთდებიან.