მეტალურგთა, მეშახტე-მაღაროელთა და ქიმიკოსთა პროფკავშირების ინფორმაციით, რუსთავის აზოტის თანამშომლები შრომის ანაზღაურების მატების მოთხოვნით გაიფიცნენ. კომპანიის შენობასთან შპს რუსთავის აზოტის თანამშრომლები დილიდან შეიკრიბნენ.

პროფკავშირების ახალგაზრდული მოძრაობის ცნობით, რუსთავის აზოტის ხელმძღვანელობას დასაქმებულებთან კომუნიკაცია ჯერჯერობით არ ჰქონია, კომპანიის წარმომადგენლისგან კი ხელფასის 5%-იანი ზრდის დაპირება მიიღეს, რაც მათთვის მიუღებელია.

"ჩვენს ხელთ არსებული ინფორმაციით, ამ დრომდე კომპანიის ერთადერთი რეაქცია ის არის, რომ კომპანიის წარმომადგენლები ცდილობენ გამოავლინონ ლიდერები და განახორციელონ ფსიქოლოგიური ზეწოლა მათი სამსახურიდან განთავისუფლების მუქარით. საწარმოში საშუალო ხელფასი 750 ლარს შეადგენს, რაც მძიმე მრეწველობის დარგობრივ სექტორში, ერთ-ერთი ყველაზე დაბალი მაჩვენებელია", — აცხადებენ პროფკავშირებში.

მათივე თქმით, კომპანია წარმოებული პროდუქციის უდიდეს ნაწილს ექსპორტზე უცხოურ ვალუტაში ყიდის.

საქართველოს მეტალურგიული, სამთო და ქიმიური მრეწველობის მუშაკთა პროფესიული კავშირი მიიჩნევს, რომ აზოტელთა მოთხოვნა ხელფასების მატებასთან დაკავშირებით აბსოლუტურად სამართლიანია და სრულ მხარდაჭერას და მათ პროტესტს სრულ სოლიდარობას უცხადებს, კომპანიას კი მოუწოდებს, რომ ხელფასების ზრდის საკითხი სასწრაფოდ განიხილოს და დადებითად გადაწყვიტოს.

თანამშრომლების პროტესტზე On.ge რუსთავის აზოტს დაუკავშირდა. მათ პასუხს მიღებისთანავე შემოგთავაზებთ.