ევროკავშირის წარმომადგენლობა აცხადებს, რომ გულთბილად მიესალმებიან პოლიტიკური ლიდერების მიერ მიღებულ გადაწყვეტილებებს, რომლებიც შეთანხმებასთან შესაბამისობაშია. განცხადებაში აღნიშნულია, რომ საპარლამენტო საქმიანობაში ჩართვა, ამნისტიის კანონპროექტის მომზადება და გიორგი რურუას შეწყალება რთული გადაწყვეტილებები იყო, რასაც გამბედაობა სჭირდებოდა.

ამავდროულად, ევროკავშირის წარმომადგენლობა აღნიშნავს, რომ ელოდებიან შემდგომ ნაბიჯებს შეთახნმების განსახორციელებლად და მოუწოდებენ დარჩენილ ოპოზიციას, შეუერთდნენ შეთანხმებას.

"ეს რთული გადაწყვეტილებები იყო, რასაც მნიშვნელოვანი პოლიტიკური გამბედაობა სჭირდებოდა. ჩვენ ველით შემდეგ ნაბიჯებს შეთანხმების შემდგომი განხორციელებისთვის, ვადების შესაბამისად, საქართველოს დემოკრატიული და კანონის უზენაესობის დღის წესრიგის ასამაღლებლად.

კიდევ ერთხელ მოვუწოდებთ პარლამენტის სხვა არჩეულ წევრებს, შეუერთდნენ შეთანხმებას და ხელი შეუწყონ მის განხორციელებას, საქართველოს, მისი მოქალაქეების, ევროკავშირ-საქართველოს ურთიერთობებისა და საქართველოს ევროატლანტიკური მომავლის ინტერესების შესაბამისად", — ვკითხულობთ განცხადებაში.