ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის თქმით, ამნისტიის შესახებ კანონპროექტის ქართული ოცნების ვერსიაში მაკო გომურის შემთხვევა გამონაკლისი იქნება.

"ჩვენ ვასრულებთ ვალდებულებას რაც არის განსაზღვრული კონკრეტული ხელშეკრულებით და რაც გულისხმობს იმ ცნობილ მოვლენებთან [2019 წლის 20 ივნისი] დაკავშირებული ყველა სამართალდარღვევის ამნისტირებას. ოღონდ ეს არ გულისხმობს ისეთი ტიპის სამართალდარღვევებს, რომელიც არის, მაგალითად, ისეთი შემთხვევა, როგორიც არის მაგალითად ქალბატონი მაკო გომურის შემთხვევა. ეს იქნება კონკრეტული გამონაკლისის სახით, ჩვენს მიერ ინიცირებულ კანონპროექტში, კონკრეტულად გაწერილი", — განაცხადა მიხეილ სარჯველაძემ.

მმართველი პარტიისა და ოპოზიციის შეხვედრის შემდეგ, სადაც მხარეები ამნისტიის კანონის დეტალებს განიხილავდნენ, სარჯველაძემ, ასევე, განაცხადა, რომ ბევრი საერთო ხედვის წერტილები გამონახა, თუმცა დარჩა საკითხები, რომელთა დაკავშირებითაც განსხვავებულ პოზიციებზე რჩებიან. საბოლოოდ, ცნობილია, რომ ამნისტიის შესახებ კანონპროექტის ორი ვერსია დაინიცირდება — ერთი ქართული ოცნების და მეორე, ოპოზიციის.

გაიგეთ მეტი: