თბილისის ბოტანიკურ ბაღში იასამნების ყვავილობის დღეები იწყება

საკურას შემდეგ, საქართველოს ეროვნულ ბოტანიკურ ბაღში იასამანი აყვავდა. 50 წელზე მეტია, რაც რეკრეაციულ ზონაში იასამნის საკოლექციო ნაკვეთი, ე. წ. სირინგარიუმია მოწყობილი. ამ მონაკვეთში იასამნის 75 ჯიში გვხვდება, რომლებიც ერთმანეთისგან ყვავილის სიდიდით, ფორმით, შეფერილობითა და ყვავილობის ვადებით განსხვავდებიან.

23, 24 და 25 აპრილს, 3 დღით, ბოტანიკური ბაღი იასამნების საკოლექციო ნაკვეთზე დამთვალიერებლებს ეპატიჟება, სადაც ეკოგანათლების სპეციალისტები სხვადასხვა აქტივობებსაც ჩაატარებენ და ბავშვებს დაასაჩუქრებენ.

იასამნების საკოლექციო ნაკვეთი ბაღის ცენტრალური შემოსასვლელიდან 1,1 კილომეტრის დაშორებით მდებარეობს. დამთვალიერებლებს ადგილზე სპეციალური მანიშნებლები დახვდებათ, რომლის საშუალებით სირინგარიუმში ამოყოფენ თავს.

იასამნის ჯიშების ყვავილობა აპრილის შუა რიცხვებიდან იწყება, ყვავილობის ხანგრძლივობა კი 10-18 დღეა. ძლიერი და ამავე დროს ნაზი სურნელების კოკრებისა და ყვავილების შეფერილობა მრავალგვარია – ქათქათა თეთრიდან მეწამულამდე და მუქ იისფერამდე.