პარტია მოქალაქეების ერთ-ერთი ლიდერის, ალეკო ელისაშვილის განცხადებით, ევროკავშირის შეთავაზება ნაციონალური მოძრაობის ლიდერის, ნიკა მელიას გირაოს გადახდაზე "ღირსეული გამოსავალია". ელისაშვილი გაუგებარსა და აუხსნელს უწოდებს მელიას უარს გირაოს სანაცვლოდ გათავისუფლებაზე.

"ძალიან ღირსეული გამოსავალი შემოგვთავაზა ევროკავშირმა. ვიღაცა კი არ გადაიხდის და ქართული ოცნება კი არ გადაიხდის გირაოს — ჩემთვის არის აბსოლუტურად აუხსნელი და გაუგებარი. ევროკავშირი გეუბნება გადავიხდი გირაოს და გამოდი ციხიდან და არა, არ გადამიხადო არავითარ შემთხვევში. ეს არის ხელის აკვრა, ხელის კვრა ევროკავშირისთვის. ვის კრავ ხელს? ევროპის კავშირს? ევროკავშირს, სადაც გვინდა, რომ შევიდეთ? [...]

რა არის აქ მორალური საკომპრომისო?! ევროკავშირი რომ გეუბნება, რომ პოლიტიკური შეთანხმების ნაწილი იყოს ვითარების განმუხტვისთვის, ქვეყნის უკეთესი მომავლისთვის, რომ ჩვენ გადავიხდით ამ გირაოს თანხას, აქ მორალური კომპრომისი ... სად ზიანდება ვინმეს ღირსება, ერთი გამაგებინეთ", — განაცხადა ელისაშვილმა პალიტრანიუსის ეთერში.

ჟურნალისტის შენიშვნაზე, რომ გირაოს სურვილის შემთხვევში მელია თავად ელისაშვილის შეთავაზებას დათანხმდებოდა, რომელმაც ევროკავშირზე გაცილებით ადრე გამოთქვა მისთვის გირაოს გადახდის სურვილი, დეპუტატმა უპასუხა, რომ ამაზე საუბარი არ უნდა.

"ამაზე მე არ მინდა ლაპარაკი, სანამ ნიკა მელია არ გამოვა ციხიდან. მე, ალბათ, ჩვენ მაგაზე ცალკე გვექნება სალაპარაკო", — განაცხადა ელისაშვილმა.

ელისაშვილის შეთავაზებას ნიკა მელიამ ასე უპასუხა:

"ჩემი ფეხით არ მომიყვანო, ალეკო, მაგ პარლამენტში, ჩემი ხელით გამოგიყვან პარლამენტიდან. აგიღებ და გამოგიტან გარეთ ახლა მართლა არ მომიყვანო, რა შენი ხელფასიდან გადამიხდი?"

შეთანხმებაში, რომელსაც ქართულმა ოცნებამ და ოპოზიციის ნაწილმა მოაწერა ხელი ვკითხულობთ, რომ "ხელმოწერიდან ერთი კვირის ვადაში, პარლამენტში წარმოდგენილმა პარტიამ უნდა მოახდინოს ინიცირება კანონისა ამნისტიის შესახებ, რომელიც 2019 წლის 19 – 21 ივნისის პროტესტებთან დაკავშირებულ ყველა დარღვევასა და დაკავებას შეეხება".

დოკუმენტის ამ ნაწილის შესახებ თავდაპირველად არსებობდა განსხვავებული ინტერპრეტაციები. მაგალითად, ქართული ოცნების დეპუტატმა, ირაკლი ქადაგიშვილმა განაცხადა, რომ პარლამენტი ამნისტიის აქტს მას შემდეგ მიიღებდა, რაც მელიას გირაოს გადაიხდიდნენ. ოცნების კიდევ ერთი ლიდერის, შალვა პაპუაშვილის თქმით, გირაო ევროკავშირში რეგისტრირებული ორგანიზაციას უნდა გადაეხადა.

რესპუბლიკური პარტიის თავმჯდომარემ, ხათუნა სამნიძემ განმარტა, რომ ევროკავშირმა გირაოს გადახდის მზაობა მელიას უფრო სწრაფად გათავისუფლებისთვის გამოთქვა და რეალურად, ეს არ არის ამნისტიის კანონპროექტზე მუშაობის დაწყების წინაპირობა. მოგვიანებით, იგივე დაადასტურა პაპუაშვილმაც:

"მას თუ ეჩქარება გამოსვლა გირაო გადაიხდება ევროკავშირის მიერ და ეს გზა არსებობს. ის თუ ფიქრობს, რომ მისი ღირსება უფრო მაღლაა, ვიდრე საქართველო, კი ბატონო. ცოტა ხანი იქნება, ამნისტიის კანონი მიღებულ იქნება და ეპატიება სავარაუდო დანაშაული", — განაცხადა პაპუაშვილმა.

გაიგეთ მეტი: