სალომე სამადაშვილი ამბობს, რომ ორბელიანის სასახლეში სამუშაო ვახშამს დაესწრო, სადაც გიორგი რურუასა და ნიკა მელიას გათავისუფლების საკითხებზე იმსჯელეს. ამის შესახებ მან ფეისბუქზე დაწერა.

მას შემდეგ, რაც ცნობილი გახდა, რომ პრეზიდენტის ადმინისტრაციაში ვახშამი იმართებოდა, ოპოზიციის წარმომადგენლების ნაწილმა ის გააკრიტიკა.

"’იიი, ვახშამზე იყავით’ რაღა უბედურებაა? ვიყავი, დიახ, ევროპული საბჭოს პრეზიდენტთან სამუშაო ვახშამზე, გამოვედი რურუას გათავისუფლების თარიღით და მელიას გათავისუფლების გეგმით, მიშელის თანდასწრებით შეთანხმებულის. მერე?" — წერს სამადაშვილი.

პრეზიდენტის სასახლეში ევროპული საბჭოს პრეზიდენტთან, შარლ მიშელთან ვახშმის შემდეგ სალომე სამადაშვილმა განაცხადა, რომ ისინი შეთანხმების შესრულების გეგმაზე შეთანხმდნენ.

როგორც მან თქვა, შემდეგ სამშაბათს, ანუ 27 აპრილს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს და ამავე დღეს პრეზიდენტი გიორგი რურუას შეიწყალებს. ამასთან, თუ ნაციონალური მოძრაობის თავმჯდომარე, ნიკა მელია გირაოს არ გადაიხდის, მას ამნისტია შეეხება.