ოზურგეთის რაიონულმა სასამართლომ საქართველოს ყოფილი პრეზიდენტის გიორგი მარგველაშვილის ყოფილ სიძეს, მინდია გოგოჭურს 4 წლით თავისუფლების აღკვეთა მიესაჯა. ის დამნაშავედ ცეცხლსასროლი იარაღის მართლსაწინააღმდეგო შეძენა, შენახვა, ტარებაში, ძალადობაში, პოლიციის თანამშრომლების მიმართ წინააღმდეგობის გაწევასა და დიდი ოდენობით ნარკოტიკული საშუალების უკანონო შეძენა-შენახვაში ცნეს.

შსს-ს თანახმად, ბრალდების მხარის მიერ სასამართლო პროცესზე წარდგენილი მტკიცებულებებით დადასტურდა, რომ 2020 წლის 18 ივლისს, ოზურგეთის მუნიციპალიტეტის სოფელ ნატანებში, შეკვეთილის დასახლებაში მდებარე სასტუმრო პარაგრაფში გოგოჭურს შელაპარაკება მოუვიდა გ.ბ.-სთან, რა დროსაც განაწყენებულმა გოგოჭურმა ცეცხლსასროლი იარაღით, რომელიც მართლსაწინააღმდეგოდ შეიძინა და ინახავდა, ფიზიკურად იძალადა გ.ბ.-ს მიმართ და შემთხვევის ადგილიდან მიიმალა.

"სამართალდამცველებმა ის 2020 წლის 19 ივლისს ქ.ბათუმში დააკავეს. დაკავებისას მან მის დასაკავებლად მისულ შსს-ს გურიის პოლიციის დეპარტამენტის თანამშრომლებს წინააღმდეგობა გაუწია, რა დროსაც სახის არეში ერთ-ერთს დაზიანება მიაყენა.

მ.გ.-ს პირადი ჩხრეკისას მაკაროვის მოდელის 9 მმ კალიბრის ცეცხლსასროლ იარაღი და ხუთი ვაზნა ამოვიღეთ, ასევე, დიდი ოდენობით 0, 648 გრ. ნარკოტიკული საშუალება ჰეროინი", — აცხადებენ პროკურატურაში.

მინდია გოგოჭურს ბრალდება სისხლის სამართლის კოდექსის 126-ე მუხლის პირველი ნაწილით (ძალადობა), 236-ე მუხლის მესამე და მეოთხე ნაწილებით (ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა და ტარება), 353-ე მუხლის პირველი ნაწილით (პოლიციის მუშაკის მიმართ წინააღმდეგობა), 260-ე მუხლის მესამე ნაწილის "ა" ქვეპუნქტით (დიდი ოდენობით ნარკოტიკული საშუალების უკანონო შეძენა-შენახვა) წარედგინა და აღკვეთის ღონისძიების სახით პატიმრობა შეეფარდა.