უკრაინის პრეზიდენტი, ვოლოდიმირ ზელენსკი აცხადებს, რომ ხუთშაბათს გამართულ შეხვედრაზე ეროვნული უსაფრთხოებისა და თავდაცვის საბჭომ განიხილა აღმოსავლეთ უკრაინაში განვითარებული მოვლენები. მისი თქმით, არმია მზადაა, სიტუაცია კი კონტროლს ექვემდებარება. აღნიშნულზე ინფორმაციას Unian.info ავრცელებს.

"დეტალებს ვერ გავამჟავნებ. სიტუაცია დონბასში ახლა კონტროლის ქვეშაა, არსებობს გარკვეული საკითხები და ჩვენ მზად ვართ ამ საკითხების გადასაჭრელად. რაც ყველაზე მთავარია, არმია მზადაა. გვესმის, რომ მასმედიაში ყველანაირი ინფორმაცია ვრცელდება, ამიტომ მსურს უკრაინის მოქალაქეები მხოლოდ გენერალური შტაბისა და პრეზიდენტის ოფისის ოფიციალურ განცხადებებს ენდონ", — აცხადებს ზელენსკი.

15 აპრილს გავრცელდა ინფორმაცია, რომ სალომე ზურაბიშვილი უკრაინაში ოფიციალური ვიზიტით ჩავა. ზუსტი თარიღი უცნობია.

პრეზიდენტის ადმინისტრაციის ინფორმაციით, ზურაბიშვილმა ვოლოდიმირ ზელენსკისთან სატელეფონო საუბრისას ყირიმსა და უკრაინის საზღვრებთან შექმნილი მდგომარეობა, შავი ზღვის უსაფრთხოების საკითხი განიხილა და შეთანხმდნენ, რომ ამ თემებზე სამუშაოდ უკრაინაში ზურაბიშვილის მომავალ ვიზიტს გამოიყენებენ.

"საქართველოს პრეზიდენტმა შეშფოთება გამოხატა რუსეთ-უკრაინის საზღვარსა და ყირიმში შექმნილ მდგომარეობასთან დაკავშირებით და სოლიდარობა გამოუცხადა უკრაინას.

სალომე ზურაბიშვილმა საუბრისას ხაზი გაუსვა უკრაინის მიერ პროვოკაციების მიმართ გამძლეობის აუცილებლობას და აღნიშნა, რომ აუცილებელია, ვიმოძრაოთ ჩვენი საერთო უსაფრთხოების ერთადერთი მიმართულებით, რომელიც არის ევროატლანტიკური ინტეგრაცია.

ორივე ქვეყნის პრეზიდენტმა ხაზგასმით აღნიშნა შავი ზღვის უსაფრთხოების მნიშვნელობა და ამ მიმართულებით NATO-სა და ევროკავშირის მაღალი დონის შეხვედრებზე საქართველოს და უკრაინის ერთობლივი მიზნების წარდგენის საჭიროება. მხარეები შეთანხმდნენ, რომ აღნიშნულ საკითხებზე სამუშაოდ გამოიყენებენ უკრაინაში საქართველოს პრეზიდენტის მომავალ ვიზიტს", — წერია ადმინისტრაციის გავრცელებულ განცხადებაში.

30 მარტს უკრაინის შეიარაღებული ძალების მთავარსარსალმა განაცხადა, რომ რუსეთმა საზღვართან და ოკუპირებულ ტერიტორიებზე ბატალიონების მობილიზება მოახდინა, რამაც ქვეყნის უსაფრთხოებას საფრთხეს უქმნის.

ვითარება შეაფასეს პენტაგონში და რუსეთის ქმედებები დაგმეს. როგორც პენტაგონის პრესსპიკერმა განაცხადა, აშშ ამ საკითხზე NATO-ს მოკავშირეებს ესაუბრება.

სატელეფონო საუბარი შედგა აშშ-ს და უკრაინის თავდაცვის მინისტრებს შორის. ლოიდ ოსტინმა უკრაინელ კოლეგას, ანდრეი ტარანს დაუდასტურა მხარდაჭერა და დაგმო რუსული პროვოკაცია. გარდა ამისა, მან განაცხადა, რომ ესკალაციის შემთხვევაში აშშ უკრაინას არ მიატოვებს.

უკრაინული მედიის ინფორმაციით, 11 აპრილს რუსეთის კონტროლირებადმა ძალებმა დონბასში ცეცხლის შეწყვეტის შეთანხმება ათჯერ დაარღვიეს, რა დროსაც, ერთი უკრაინელი სამხედრო დაიღუპა, ერთი კი დაიჭრა.

მედიის ცნობით, უკრაინული პოზიციების მიმართულებით ნაღმმტყორცნი და ტანკსაწინააღმდეგო ყუმბარმტყორცნები გამოიყენეს, რაც მინსკის შეთახმმების თანახმად აკრძალული იყო. უკრაინული მედიის ინფორმაციით, უკრაინელმა ჯარისკაცებმა მათ საპასუხო ცეცხლი გაუხსნეს.