"ძალადობაზე საუბარი არასოდეს არ არის გვიან", — აცხადებს კულტურის მინისტრი, თეა წულუკიანი და მსახიობსა და ტელეწამყვანს, ნინუცა მაყაშვილს საგამოძიებო უწყებებთან თანამშრომლობისკენ მოუწოდებს.

"გასაგებია, რომ 11 წლის წინ ქალები და არა მხოლოდ 11 წლის წინ, რამდენიმე წლის წინაც ვერ საუბრობდნენ ღიად. სწორედ ამიტომ ქართული ოცნების ხელისუფლების ინიციატივითა და გადაწყვეტილებით, მე წილად მხვდა პატივი, რაც გულისხმობდა ევროპაში ყველაზე ძლიერი, ქალზე ძალადობის წინააღმდეგ ინსტრუმენტის ხელმოწერა, ეს გახლავთ სტამბოლის კონვენცია, რომელსაც მე ხელი მოვაწერე 2014 წელს თქვენი ყველას, ქართველი გოგოებისა და ქალების სახელით.

ძალიან კარგია, რომ იმ 2-წლიანმა კამპანიამ, რაც იუსტიციის სამინისტროში ვაწარმოეთ ჩვენს პოლიციასთან ერთად, გამოიღო შედეგი და დღეს შედარებაც კი არ შეიძლება, იმდენად ღიად საუბრობენ უკვე ქალები წარსულ ძალადობაზე. რამდენადაც ჩემთვის ცნობილია, მიუხედავად იმისა, რომ ნინუცა მაყაშვილი დაიბარეს საგამოძიებო უწყებაში, ჯერ კიდევ არ მისულა. იმედი მაქვს, რომ უარს არ აცხადებს. მე მინდა მას მოვუწოდო ითანამშროლოს საგამოძიებო უწყებებთან, რადგან ეს სხვა გოგოების, სხვა ქალების უფლებების დაცვისთვის არის უკიდურესად მნიშვნელოვანი.", — თქვა მან.

წულუკიანი, რუსთაველის თეატრის დასის ხელმძღვანელის, რობერტ სტურუას განცხადებებსაც გამოეხაურა და თქვა, რომ მას ქვეყანაში მხოლოდ ერთი ბადალი ჰყავს და მოუწოდა საზოგადოებას, რომ შეწყვიტონ რეჟისორზე "თავდასხმები". მინისტრის თქმით, მისი თეატრიდან გაშვება არ იგეგმება.

მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. მაყაშვილმა განაცხადა, რომ ყოფილი ქმარი მასზე ფიზიკურად ძალადობდა ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცახდებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

მაყაშვილის განცხადებას რუსთაველის თეატრი გამოეხმაურა. მათი თქმით, გმობენ ყოველგვარ ძალადობას. კითხვაზე, აპირებენ თუ არა ბესო ზანგურთან თანამშრომლობის გაგრძელებას, თეატრში პასუხობენ, რომ ძალადობის დამტკიცებისა და იურიდიული დოკუმენტის გარეშე ამის განხილვის უფლება არ აქვთ.

"ამ ეტაპზე ჩვენ ვემიჯნებით და ვგმობთ ყველანაირ ძალადობას, მაგრამ ჩვენ არა ვართ იურიდიული დაწესებულება, რომ ეს გამოვიძიოთ. [...] თეატრს არ აქვს უფლება, იურიდიული დოკუმენტის გარეშე განიხილოს რამე", — განაცხადეს პრესსამსახურში.

საჯარო განცხადების შემდეგ, ნინუცა მაყაშვილი შსს-ში გამოკითხვაზე დაიბარეს.

ამავე თემაზე: