პარტია გირჩის ერთ-ერთი ლიდერი, იაგო ხვიჩია აცხადებს, რომ #metoo კამპანიები არის ბოროტება. ასე გამოეხმაურა იგი მსახიობ ნინუცა მაყაშვილის მიერ ყოფილი ქმრის ძალადობაში დადანაშაულების შემდეგ განვითარებულ მოვლენებს.

"ზოგადად, #metoo კამპანიები არის ბოროტება, იქედან გამომდინარე, რომ არ შეიძლება თავის დაცვა. სასამართლო პროცესია, სადაც თავის დაცვის საშუალებას არ გაძლევენ. პროსტა გლანძღავენ. შეიძლება პირველწყარო სამართლიანი იყოს, უსამართლო იყოს, მაგრამ, თვითონ ფორმა #metoo კამპანიების, არის მიუღებელი, ამაზრზენი და ჩემი აზრით, ყველა ნორმალური ადამიანი უნდა გაემიჯნოს მას [...] მტკიცებულებების გარეშე ტალახის სროლა ყოფილ ქმარზე არის ამაზრზენი საქციელი", — განაცხადა იაგო ხვიჩიამ.

იგი, ასევე, დაეთანხმა რუსთაველის თეატრის სამხატვრო ხელმძღვანელის, რობერტ სტურუას შეფასებას ამ საკითხზე. სტურუამ მაყაშვილის განცხადება საბჭოთა კავშირის რეპრესიებს შეადარა.

"მართალია რობერტ სტურუა, ზოგადად. უბრალოდ, პროსტა ფიზიკურად აიფარეს 11 წლის წინანდელი ამბავი, როდესაც, მსახიობმა თქვა, რომ ჩემი ქმარი იყოო და ჩემზე ძალადობდაო", — ამბობს ხვიჩა.

რობერტ სტურუას დაეთანხმა ხვიჩიას თანაპარტიელი, ვახტანგ მეგრელიშვილიც.

მსახიობმა და ტელეწამყვანმა, ნინუცა მაყაშვილმა ყოფილ ქმარი, რუსთაველის თეატრის მსახიობი, ბესო ზანგურს ოჯახში ძალადობაში რუსთავი 2-ის გადაცემა ფარულ კონვერტში სტუმრობისას დაადანაშაულა.

"არ მახსოვს რა იყო მიზეზი, მაგრამ მახსოვს, რომ ეს ყველაფერი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცხადებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

მაყაშვილს სოლიდარობა არაერთმა კოლეგამ და ცნობილმა სახემ გამოუცხადა. თავად ზანგური ყველა მსახიობს, ვინც მაყაშვილს სოლიდარობას უცხადებს, რუსთაველის თეატრსა და მის სამხატვრო ხელმძღვანელზე, რობერტ სტურუაზე თავდასხმაში ადანაშაულებს.

გაიგეთ მეტი: