დღეს ზუგდიდში კორცხელის საარჩევნო უბანზე ნაციონალური მოძრაობის ლიდერების ცემის ფაქტს ცენტრალური საარჩევნო კომისიის თავჯდომარე თამარ ჟვანია ეხმაურება:

"ასეთი დაპირისპირება არ მოქმედებს დადებითად საარჩევნო გარემოზე და ზოგადად პროცესს აზიანებს. იმის მიუხედავად, რომ საარჩევნო უბნებში შიგნით პროცესი მშვიდად, წესისამებრ მიმდინარეობს, მე მინდა მივმართო ყველა პოლიტიკურ მხარეს, მათ მხარდამჭერებს, ნებისმიერ დაინტერესებულ პირსა და მოქალაქეს, რომ არჩევნები ეს სამოქალაქო პროცესია და ეს არაა გარჩევების დღე".

ჟვანიამ მიმართვის ადრესატებს სიმშვიდისკენ და დაპირისპირებებისგან თავის არიდებისკენ მოუწოდა:

"საშუალება მიეცით ხალხს თავისუფლად გამოხატონ ნება არჩევნებზე".

ზუგდიდში, კორცხელის საარჩევნო უბანზე, სადაც შუალედური ადგილობრივი თვითმმართველობის არჩევნები მიმდინარეობს, ნაციონალური მოძრაობის წევრები, მათ შორის, გიგა ბოკერია და ნიკა მელია რამდენიმე საათის წინ ცემეს.

შსს–მ ზუგდიდში ნაცმოძრაობის ლიდერების ცემის ფაქტზე გამოძიება დაიწყო.