პრეზიდენტმა, სალომე ზურაბიშვილმა დათა ვანიშვილი სიკვდილის შემდეგ სამოქალაქო თავდადებისთვის მედლით დააჯილდოვა.

"ეს დღე შევარჩიეთ იმთავითვე, რათა პატივი მიგვეგო ადამიანისთვის, რომელიც გახდა ცოტა ხანში ერთგვარი სიმბოლო შემართებისა და შეუგუებლობის. დავით ვანიშვილის სახელი შემოვიდა ჩვენს ისტორიაში, არის სიმბოლო იმ უსამართლობის და იმ გაუსაძლისი მდგომარეობის, რომელშიც ცხოვრობენ ჩვენი თანამემამულეები საოკუპაციო ხაზის ორივე მხარეს და დღეს მინდა 9 აპრილს სწორედ დამოუკიდებლობის დღეს, რომ გადავცე მის ოჯახს პრეზიდენტის მედალი, როგორც ნიშანი ჩვენი, ყველას უდიდესი პატივისცემის და ჩვენი იმედის, რომ ამ სიტუაციას გადავლახავთ, საქართველო გამთლიანებული იქნება და ასეთი ადამიანები თავიანთ სოფლებში მშვიდად იქნებიან და აღარ ექნებათ ის აუცილებლობა, რომ ამ უსამართლობას გაუძლონ და გადალახონ", — განაცხადა ზურაბიშვილმა.

ოკუპაციასთან შეუპოვარი ბრძოლის სახე, ოკუპირებული რეგიონის ხმა და გამყოფ ხაზს მიღმა დარჩენილი საფლავების ჭირისუფალი, დათა პაპა ხურვალეთში 22 მარტს დაკრძალეს. როგორც მისი ცხოვრების ბოლო წლები, გასვენების პროცესიაც მავთულხლართებით იყო გაყოფილი. საოკუპაციო ხაზის ორივე მხარეს პაპას გარდაცვალებას გლოვობდნენ.

გამოსამშვიდობებლად მისულმა ნათესავებმა, რიგითმა მოქალაქეებმა, პოლიტიკოსებმა და აქტივისტებმა ის საქართველოს ჰიმნით გააცილეს. იქ, სადაც დათა პაპა სტუმრებთან სასაუბროდ ჩადიოდა, საქართველოს დროშაც აფრიალდა. მავთულხლართებში კი მის პატივსაცემად დატოვებული ყვავილები იყო დამაგრებული.

დათა პაპასთან გამოსამშვიდობებლად იყო ჩასული ექსპრეზიდენტი, გიორგი მარგველაშვილიც, რომელმაც თქვა, რომ პაპა ჩვენი გაუტეხლობის და გამარჯვების სიმბოლოა. ექიმმა ვაჟა გაფრინდაშვილმა კი მას საქართველოს დამოუკიდებლობისთვის ბრძოლის სიმბოლო უწოდა.

დაკრძალვის დღეს ადგილზე არ გამოჩენილან სამთავრობო ლიდერები. გარდაცვლილს ისინი ფეისბუქპოსტებით დაემშვიდობნენ. მანამდე საოკუპაციო ხაზთან შერიგების საკითხებში სახელმწიფო მინისტრი იყო ჩასული.

დათა ვანიშვილი 19 მარტს, 88 წლის ასაკში გარდაიცვალა. პაპას ფილტვების ანთება ჰქონდა. მისი მდგომარეობა გასული წლის დეკემბერში დამძიმდა. დათა პაპას ცოლი, ვალია ვანიშვილი მაშინ ამერიკის ხმასთან სატელეფონო საუბარში ამბობდა, რომ მათთან რამდენჯერმე იყვნენ ექიმები ცხინვალიდან და ნემსი გაუკეთეს. დათა ვანიშვილის საქართველს კონტროლირებად ტერიტორიაზე გადმოყვანა ვერ მოხერხდა.

დათა ვანიშვილი არ აღიარებდა დე ფაქტო რესპუბლიკას და აცხადებდა, რომ საქართველოს მოქალაქეა და არ აპირებს საკუთარი სახლი დათმოს. ის საოკუპაციო ხაზს მიღმა მცხოვრებ ადამიანებსა თუ ვიზიტორებს მავთულხლართებიდან ეკონტაქტებოდა, რის გამოც ოკუპანტებმა არაერთხელ დააკავეს.

ნახეთ ვიდეო On.ge-ს არქივიდან:

გაიგეთ მეტი:

• როგორ გვართმევს რუსეთი საქართველოს — დაუსრულებელი ომი