სოციალური სამართლიანობის ცენტრის (ყოფილი EMC) ცნობით, ბათუმის საქალაქო სასამართლომ ბათუმის ბულვარში სასტუმრო ამბასადორის მშენებლობის შეჩერებაზე მათი და საზოგადოება ბათომის მოთხოვნა სათანადო დასაბუთების გარეშე არ დააკმაყოფილა.

მათი ინფორმაციით, "ამ გადაწყვეტილებით სასამართლომ ვერ შეძლო საჯარო ინტერესის დაცვის სადარაჯოზე დადგომა და აღმასრულებელი ხელისუფლების თვითნებური გადაწყვეტილებების რეალური შეკავება და კონტროლი". ისინი მიღებულ განჩინებას ქუთაისის სააპელაციო სასამართლოში გაასაჩივრებენ, რომლის ფარგლებშიც მშენებლობის დაუყოვნებლივ შეჩერებასა და კულტურული მემკვიდრეობის დაცვის მაღალი ინტერესების ხელყოფის აღკვეთას მოითხოვენ.

"ამბასადორი ბათუმის ტერიტორიაზე უკვე მე-9 სართულის მშენებლობა მიმდინარეობს, რაც ნიშნავს იმას, რომ ამ დროისთვის ძეგლისთვის დასაშვებ პარამეტრებზე უკვე 6 სართულით მეტია აშენებული.

ბათუმის საქალაქო სასამართლომ არ გაიზიარა, რომ მშენებლობის დაუყოვნებლივ შეჩერებაზე უარის თქმით შეუქცევადი ზიანი ადგება კულტურული მემკვიდრეობის ძეგლს, რომლის მნიშვნელობა და ღირებულება ქალაქისთვის შეუფასებელია. სასამართლო განჩინებაში საერთოდ არ არის მოცემული არგუმენტები და დასაბუთება, თუ რატომ იქნა მიჩნეული, რომ არ არსებობს სადავო აქტების შეჩერების საფუძველი. განჩინება იმდენად დაუსაბუთებელია, რომ სრულიად გაუგებარი ხდება, რატომ არ იზიარებს სასამართლო მოსარჩელეთა პოზიციასა და წარდგენილ მტკიცებულებებს", — აცხადებს სოციალური სამართლიანობის ცენტრი.

სოციალური სამართლიანობის ცენტრი უკიდურესად პრობლემურად მიიჩნევს იმასაც, რომ "საზოგადოების ლეგიტიმური პროტესტის მიუხედავად, აჭარის მთავრობის წარმომადგენელები, ამბასადორი ბათუმის უკანონო მშენებლობის უგულებელყოფის პარალელურად, საჯარო ინტერესის დათმობას კერძო კომპანიების სასარგებლოდ სხვა სასტუმროების შემთხვევაშიც განაგრძობენ".

ბათუმის ბულვარში ბალნეოლოგიურ-გამაჯანსაღებელი ცენტრის აშენება იგეგმება, რასაც მოსახლეობა აპროტესტებს. საინვესტიციო პროექტს ქართული კომპანია ამბასადორი ახორციელებს.