ოჯახის გადაწყვეტილებით, აღსრულდება გურამ დოჩანაშვილის ანდერძი და მწერალი საბურთალოს სასაფლაოზე, შვილის საფლავის გვერდით 6 აპრილს დაიკრძალება. ინფორმაცია ამის შესახებ On.ge-ს თბილისის მერიაში მიაწოდეს.

მერიაში აცხადებენ, რომ მთავრობის მხრიდან მთაწმინდის პანთეონში დაკრძალვა იყო შეთავაზებული.

გურამ დოჩანაშვილი 82 წლის ასაკში 3 აპრილს გარდაიცვალა. ის ორი კვირის განმავლობაში რეანიმაციულ განყოფილებაში იყო.

კლასიკოსი მწერალი რამდენიმე რომანისა და მოთხრობების ავტორია, მათ შორისაა მკითხველისთვის გამორჩეულად საყვარელი "სამოსელი პირველი", "კაცი, რომელსაც ლიტერატურა ძლიერ უყვარდა", "კეჟერაძეები" და სხვა. დოჩანაშვილი იყო თბილისის საპატიო მოქალაქე, მიღებული აქვს წმინდა გიორგის ოქროს ორდენი, ასევე, ლიტერატურული პრემია საბა, ივანე ჯავახიშვილის სახელობის მედალი, საქართველოს სახელმწიფო პრემია. On.ge უსამძიმრებს ოჯახს და მკითხველს გურამ დოჩანაშვილის გარდაცვალების გამო.