ბათუმში გირჩის აქტივისტი, ირაკლი კუკანია On.ge-სთან ამბობს, რომ პოლიციელებმა მას წიხლი დაარტყეს. ის დაკავებულიც იყო, თუმცა განყოფილებიდან ხელწერილით გამოუშვეს. კუკანია სირცხვილიას ოფისში პოლიციის შეჭრის შესახებ გვიყვება:

"ხულიგნურად, ბანდიტებივით დაიწყეს შემოჭრა. ისე აღმოჩნდა, რომ კარებში ვიყავი მე, ვეუბნებოდი, მანახეთ დოკუმენტი-მეთქი, არ ვუშვებდი შიგნით. დაიწყეს მოწოლა პოლიციელებმა, ჩამავლეს ხელი, ტანსაცმელი შემომახიეს, ტელეფონიც დამიზიანეს და დაიწყეს ჩემი დაკავება. ამ დროს წავიქეცი, ფეხი მომხვდა თავში და ხელებზე. რაღაცას ჩავებღაუჭე, რომ არ დავეკავებინე. ხელი რომ გამეშვა, წიხლს მირტყამდნენ. მაქვს დაზიანებები, რომლებიც ვიზუალურადაც ჩანს. ძირს ხოხიალის მერე დამანებეს თავი, მომეშველნენ მეგობრები. დაახლოებით 5 წუთის მერე, როცა ფეხზე წამოვდექი, ისევ მოგვივიდა პოლიციასთან შელაპარაკება, ვუთხარი, რომ მათი ნდობა არ მქონდა. ჩამავლეს ხელი და წამიყვანეს მანქანისკენ. არ ვჯდებოდი მანქანაში, იქაც მომხვდა რამდენიმე წიხლი და ჩამსვეს, წამიყვანეს განყოფილებაში. უნდოდათ დროებითი დაკავების იზოლატორში გადავეყვანე, პოლიციელმა დარეკა თავის ზემდგომთან და მერე მითხრეს, რომ არ გამომიშვებდნენ. მე ვარაუდი მაქვს, რომ რადგან ეს დაზიანებები მეტყობოდა, მაგიტომ გამომიშვეს ხელწერილით", — ამბობს ის.

კუკანია აღნიშნავს, რომ დასჭირდა სასწრაფო დახმარების გამოძახებაც, რის შემდეგაც ექიმებმა დამამშვიდებელი მისცეს და დაბრუნდა სირცხვილიას ოფისში.

სირცხვილიას აქტივისტები, რომლებიც ბათუმის რეგიონული ოფისიდან პოლიციამ გამოიყვანა, შენობაში უკვე დაბრუნდნენ. ისინი ამბობენ, რომ პოლიციამ ძალა გამოიყენა და ოფისში შევიდა ისე, რომ არ წარუდგენია დოკუმენტაცია, რის საფუძველზე აკეთებდა ამას.

"გვითხრეს, რომ ეს არის ბარი და ამის საფუძველზე აპირებდნენ აქ შემოსვლას. შემოიჭრნენ, ჩამოხიეს პოსტერები, გაიყვანეს ოფისში მყოფი ადამიანები და ახლა ისევ მოგვიწოდებენ, დავბრუნდეთ შიგნით", — აცხადებს ერთ-ერთი აქტივისტი.

"გვცემდნენ, გვათრევდნენ, ხელი მაქვს ნაღრძობი, გაგვიტეხეს კარები, თმებით გვათრიეს, ისე ჩამოგვიყვანეს. ლეკვი ეჭირა ერთ ადამიანს და ლეკვიანად სცემეს, ისე ჩატენეს მანქანაში", — ამბობს კიდევ ერთი ადამიანი.

აქტივისტების ინფორმაციით, ამ დრომდე დაკავებულია დაახლოებით 4-5 ადამიანი, შსს-სთან ამის დაზუსტებას On.ge კვლავ ცდილობს.

პოლიციელების ნაწილმა სირცხვილიას ოფისის მიმდებარე უკვე ტერიტორია დატოვა, ნაწილი კი კვლავ იქ რჩება.

ბათუმში, სირცხვილიას რეგიონულ ოფისთან პოლიცია დაახლოებით 00:00 საათისთვის გამოჩნდა. შეკრებილები კომენდანტის საათს აპროტესტებდნენ. მოძრაობის ინფორმაციით, აჭარის პოლიცია მათ ოფისში შეიჭრა.