დაავადებათა კონტროლის ეროვნული ცენტრის გადამდებ დაავადებათა დეპარტამენტის ხელმძღვანელის, ხათუნა ზახაშვილის განცხადებით, დღეისთვის კვლევაშია და რეგისტრირებულია რეინფექციაზე საეჭვო 140-მდე შემთხვევა, მათ შორის, 16-მდე შემთხვევაში კვლევა დასრულებულია და კორონავირუსით რეინფიცირების სამი შემთხვევა დადასტურდა.

"დღეისთვის კვლევაშია და რეგისტრირებული გვაქვს 140-მდე შემთხვევა რეინფექციაზე საეჭვო, მათ შორის, 16-მდე შემთხვევაში კვლევა დასრულებულია და სამი შედეგი გვაქვს მიღებული, როდესაც ეს არის ნამდვილად რეინფექცია, კვლევები გრძელდება", — განაცხადა ხათუნა ზახაშვილმა.

მისივე განმარტებით, რეინფექციად განისაზღვრება ისეთი შემთხვევები, როდესაც ადამიანის ჭეშმარიტი ინფიცირება ორჯერ, თანმიმდევრულად ხდება, ისე რომ ერთ-ერთ შემთხვევაში ადამიანი სრულად გამოჯანმრთელდა და მისი ინფიცირება მეორედ მოხდა.

"ასეთი შემთხვევების რაოდენობა მთელ მსოფლიოში მატულობს, როგორც ჩანს, ამ ვირუსის მიმართ იმ იმედით განწყობა, რომ მას მცირე რეინფიცირება ექნებოდა, ან თითქმის არ ექნებოდა რეინფიცირების შემთხვევები, ჭეშმარიტი არ აღმოჩნდა", — თქვა მან.

ზახაშვილის თქმით, ბოლო კვლევებით მიჩნეულია, რომ სულ ცოტა უკვე გადატანილი შემთხვევების 0,68%-ის ხელმეორე ინფიცირება მოხდა.

"ასევე, დღეისთვის ცნობილია, რომ რიგ ქვეყნებში, სადაც უფრო თანმიმდევრული და მიზანმიმართული კვლევები მიმდინარეობს, რეინფიცირების შემთხვევების რიცხვი შეიძლება იყოს უფრო მეტი", — აღნიშნავს გადამდებ დაავადებათა დეპარტამენტის ხელმძღვანელი.

ზახაშვილის თქმით, ფაქტია, რომ ამ ვირუსით შეიძლება ადამიანი რამდენჯერმე დაავადდეს, ამიტომ ყველას ყურადღებისკენ მოუწოდებს.