ჯანდაცვის მინისტრის, ეკატერინე ტიკარაძის განცხადებით, Pfizer-თან ბოლო მოლაპარაკებების დროს შეთანხმდნენ, რომ საქართველო ვაქცინის დამატებით 1 მილიონ დოზას მიიღებს. ამის შესახებ მან სამინისტროში გამართულ ბრიფინგზე ისაუბრა.

"რაც შეეხება Pfizer-ს და ასევე, სხვა მწარმოებლებს, ჩვენ გვაქვს მათთან აქტიური კომუნიკაცია. Pfizer-თან მიმართებაში, საბოლოო კომუნიკაციის შეჯერება მოხდა 1 მილიონ დოზაზე, თუმცა ამ ეტაპისთვის ჩვენ ველოდებით დასტურს მათგან, თუ როდის და რა ფორმატით იქნება მოწოდება ან რა განრიგი იქნება შემოთავაზებული ამ მილიონი დოზის მოწოდებაზე", — თქვა ტიკარაძემ.

Pfizer-ის ვაქცინის 29 250 დოზა საქართველოში 25 მარტს გამთენიისას ჩამოიტანეს. ამიერიდან, მოქალაქეებს კორონავირუსის საწინააღმდეგო აცრის ჩატარება ორი, AstraZeneca-სა და Pfizer-ს შორის არჩევანის გაკეთებით შეეძლებათ.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო, ხოლო ვაქცინაციის პროცესში 65 წელს ზევით მოქალაქეები 25 მარტიდან ჩაერთნენ.

მინისტრის მოადგილე, თამარ გაბუნიამ კი არ გამორცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ.