საპარლამენტო უმრავლესობის ერთ-ერთი ლიდერი, ბექა დავითულიანი ამბობს, რომ გიორგი რურუა პოლიტიკოსი არ არის, შესაბამისად, ის პოლიტპატიმარი ვერც იქნება.

"გიორგი რურუა პოლიტიკოსი არ არის და პოლიტპატიმარი როგორ არის არ ვიცი. ვითომ მთავარი არხის მეწილე და მთავარ არხზეც, რამდენადაც მე ვიცი, 2 500 ლარით არის მეწილე და როგორ არის პოლიტპატიმარი, ესეც არ ვიცი", — განაცხადა დავითულიანმა POSTV-ის ეთერში.

დეპუტატმა ისაუბრა ნაციონალური მოძრაობის თავმჯდომარეზეც. დავითულიანის თქმით, ნიკა მელიას შეუძლია გირაოს სანაცვლოდ ციხიდან გამოსვლა, ამიტომ, ვერც ის ჩაითვლება პოლიტპატიმრად.

"10 000 ევროიანი პოლიტპატიმარი მე არ მინახავს. გადაიხდის თუ არა გამოვა — ასეთია შეთანხმება და როგორ არის პოლიტპატიმარი?! [...]

აქედან გამომდინარე, პოლიტპატიმრების საკითხი არ დგას, დგას პატიმრების საკითხი", — განაცხადა დავითულიანმა.

ამ წუთებში ევროკავშირის წარმომადგენელი, კრისტიან დანიელსონი ქართული ოცნებისა და ოპოზიციის ლიდერებს ხვდება. განსახილველ საკითხებს შორის ერთ-ერთი, სავარაუდოდ, სწორედ გიორგი რურუასა და ნიკა მელიას გათავისუფლებაა. ოპოზიცია მათ პოლიტპატიმრებად მოიხსენიებს, მმართველ პარტიაში კი აცხადებენ, რომ ქვეყანაში პოლიტპატიმრები არ არსებობენ.

გაიგეთ მეტი: