პოლიტპატიმრებზე დასმული კითხვის საპასუხოდ, ევროპული საბჭოს პრეზიდენტის სპეციალურმა წარმომადგენელმა, კრისტიან დანიელსონმა განაცხადა, რომ საქართველოში სტრუქტურული რეფორმების გატარება აუცილებელია. მისივე თქმით, სახელმწიფო ინსტიტუტებისა და არჩევნების მიმართ ნდობა მნიშვნელოვანია.

"თქვენ იცით პრეზიდენტ მიშელის შემოთავაზებული 6-პუნქტიანი გეგმის შესახებ, რომელიც პრეზიდენტმა მიშელმა წარადგინა. იქ მართლმსაჯულების სისტემასა და შერჩევითი სამართლის საკითხზეა საუბარი. ამ კონტექსტში ეს საკითხები განიხილება.

არსებითია საქართველოში სტრუქტურული რეფორმების გატარება. ძალიან მნიშვნელოვანია სახელმწიფო ინსტიტუტებისა და არჩევნების მიმართ ნდობა. ამიტომაც, პრეზიდენტ მიშელის 6-პუნქტიან გეგმაში ხაზგასმულია მართლმსაჯულების საკითხი და საარჩევნო კანონმდებლობა", — განაცხადა დანიელსონმა.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის დღეს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს ორშაბათიდან, 29 მარტიდან შეხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.