ევროპული საბჭოს პრეზიდენტის სპეციალური წარმომადგენელის, კრისტიან დანიელსონის განცხადებით, ევროკავშირი ძალიან აქტიურად არის ჩართული რომ საქართველოს ამ კრიზისის მოგვარებაში დაეხმაროს, მაგრამ აღნიშნავს, რომ მის მოგვარებაზე პასუხისმგებლობა არა ევროკავშირის არის, არამედ აქაურ პოლიტიკურ ლიდერებზეა.

"დღეს მთელი დღე იყო მოსამზადებელი სამუშაოები იმისთვის, რომ ხვალ პოლიტიკურ პარტიებს შევხვდეთ. დისტანციურად 7 ევროპელ პარლამენტარს შევხვდი იმისთვის, რომ მომავალ ნაბიჯებზე გვესაუბრა და განგვეხილა. ასევე, დღეს საქართველოს სამოქალაქო საზოგადოების წარმომადგენლებს, შევხვდი", — განაცხადა შვედმა დიპლომატმა.

მისივე თქმით, გუშინდელი განცხადება ძალიან საინტერესო იყო იმ თემებთან დაკავშირებით, რაც დღესაც განიხილეს. დანიელსონი ამბობს, რომ საუბარი არის კომპრომისზე, რომელიც საქართველოს მომავლისთვის ძალიან მნიშვნელოვანია.

"ჩვენი წინა მისიის შემდეგ ბრიუსელში ყველა ინსტიტუციასთან მქონდა ურთიერთობაა ვინც საქართველოსთან დაკავშირებულ საკითხებზე არის ჩართული. ეს ინსტიტუციები მოიცავდა როგორც პრეზიდენტ მიშელს, ასევე, ევროპის საგარეო ქმედებათა სამსახურს, ევროპარლამენტს და ევროკომისიას. ევროკავშირი ძალიან აქტიურად არის ჩართული რომ საქართველოს დაეხმაროს ამ კრიზისის მოგვარებაში. რა თქმა უნდა, ამაზე პასუხისმგებლობა არა ევროკავშირის, არამედ აქაურ პოლიტიკურ ლიდერებზეა.

მან კიდევ ერთხელ აღნიშნა, რომ ახლა გამბედაობა და კომპრომისია საჭირო.

"კომპრომისი სისუსტის ნიშანი არ არის, პირიქით, კომპრომისი არის სიძლიერის ნიშანი, დემოკრატიის ნიშანი და კომპრომისი არის ის გზა, რომელიც არის ევროპული", — განაცხადა დანიელსონმა.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის დღეს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს ორშაბათიდან, 29 მარტიდან შეხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.