პარტია მოქალაქეების ლიდერის, ალეკო ელისაშვილის აზრით, ლელო იყო მთავარი, რატომაც მოლაპარაკებების პროცესი "გაიჭედა". ამის შესახებ მან Postv-ის ეთერში ისაუბრა.

"ლელო არის აუხსნელი ჩემთვის. ლელოს პოზიცია იყო მთავარი, რატომაც გაიჭედა პროცესი, ჩემი აზრით. ნაციონალური მოძრაობა რაც არის და რაც უნდა, გასაგები არის. ჩემთვისაც პირადად არის გაუგებარი მათი პოზიცია, აი, უბრალოდ გაუგებარი.

ელემენტარული ახლა, როდესაც რაღაცა რესპექტაბელურ ამომრჩეველზე, საშუალო და ოდნავ შეძლებულ ხალხზე გაქვს გათვლა და ამ დროს რაღაც ქუჩაში რევოლუციონერობ და თან არ არის შენი სტიქია ეს რევოლუციონერობა, რატომ აკეთებ ამას, არ ვიცი. არის რაღაცები, რომელზეც უბრალოდ პასუხი არ მაქვს, თუ იმის მიღმა არ დგას რაღაცები, რაც არ ვიცი. შეიძლება იდგეს რაღაცები, რაც არ ვიცი. თავს ვერ დავდებ, მაგრამ რაციონალურად რომ გაჰყვე, ორჯერ ორი ოთხია, რომ აუხსნელია", — ამბობს ის.

პარტია ლელომ რამდენიმე დღის წინ გამოკითხვის ჩატარება დააანონსა. მათი თქმით, ეს კითხვა ვადამდელ არჩევნებს შეეხება და ყველას ექნება შესაძლებლობა, საკუთარი მოსაზრება დააფიქსიროს.

ამასთან, ოპოზიციასა და ქართულ ოცნებას შორის რამდენჯერმე ჩაშლილი მოლაპარაკებების შემდეგ, მედიაციის პროცესი კვლავ განახლდება. ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი სამუშაო პროცესს ორშაბათიდან, 29 მარტიდან დაიწყებს. როგორც ევროკავშირის წარმომადგენლობაში On.ge-ს განუცხადეს, ის საქართველოში შაბათს ან კვირას ჩამოვა. ჯერ-ჯერობით, შეხვედრების ზუსტი დღის წესრიგი უცნობია.

22 მარტს შარლ მიშელმა განაცხადა, რომ დანიელსონი საქართველოში მედიაციის გასაგრძელებლად დაბრუნდებოდა. მისი თქმით, საქართველოს მოქალაქეების ინტერესებისთვის, კომპრომისებზე წავსლის დროა. დანიელსონის ბოლო ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.