პრემიერმინისტრ ირაკლი ღარიბაშვილის ინფორმაციით, ევროკავშირში საქართველოს მისიის ყოფილი ხელმძღვანელი ნატა საბანაძე სისტემიდან წასვლას ზაფხულში აპირებდა, თუმცა მან გადადგომა დააჩქარა. ამის შესახებ ღარიბაშვილმა ჟურნალისტებს განუცხადა.

"რაც შეეხება ელჩი საბანაძის გადადგომას. მე მოვისმინე ინფორმაცია საგარეო საქმეთა მინისტრ დავით ზალკალიანისგან, რომ ელჩი საბანაძე აპირებდა სისტემიდან წასვლას ზაფხულში, მაგრამ მან უბრალოდ დააჩქარა გადადგომა. ამის თაობაზე, მგონი, საგარეო საქმეთა სამინისტრომ გააკეთა ნათელი განმარტება და არ საჭიროებს დამატებით კომენტირებას", — აღნიშნა პრემიერმა.

ნატალია საბანაძემ ევროკავშირთან საქართველოს მისიის ხელმძღვანელისა და ბელგიასა და ლუქსემბურუგში საქართველოს ელჩის თანამდებობა 21 მარტს დატოვა. მისი თქმით, გადადგომის მიუხედავად, საქართველოს ევროპული მომავლისთვის ყოველთვის იბრძოლებს. 22 მარტს, მან ტვიტერზე იმედი გამოთქვა, რომ მმართველ პარტიასა და ოპოზიციას შორის მოლაპარაკებები გაგრძელდება და საქართველო გახანგრძლივებულ კრიზისს ვერ გაუძლებს.

გადადგომის შემდეგ Le Monde-თან ინტერვიუში, საბანაძემ აღნიშნა, რომ ყველა ჩვენი ლიდერი ამბობს, რომ ვიყოთ პროევროპელები, თუმცა თქმა საკმარისი არ არის, "საჭიროა რომ ვიყოთ".

გაიგეთ მეტი: