საგარეო საქმეთა მინისტრმა, დავით ზალკალიანმა მთავარი არხის ჟურნალისტს უთხრა, რომ საქართველოს ყოფილმა ელჩის ევროკავშირში, ნატა საბანაძის მმართველ გუნდთან დაპირისპირების შესახებ ინფორმაცია ტყუილია.

"იტყუებით. ეს ასე არ არის. თქვენ თუ ნახეთ მისი შემდგომი განცხადება, რომელიც ფეისბუქზე დაპოსტა, ის ძალიან მკაფიო განმარტებას აკეთებს. ძალიან კარგად წაიკითხეთ მისი შემდგომი განცხადება", — უთხრა მინისტრმა ჟურნალისტს და იქვე საბანაძის განცხადებაც წაუკითხა, რომელიც ამჟამად ფეისბუქზე საჯაროდ არ იძებნება.

ზალკალიანის მიერ წაკითხული პოსტის მიხედვით, საბანაძე ამბობს შემდეგს:

"ჩემი გადაწყვეტილება იყო პირადი პოზიციის დაფიქსირება. მისი ზედმეტად პოლიტიზება უადგილოა. ამ სტატიაში საუბარია პოლიტიკურ ლიდერებზე, მთელ პოლიტიკურ კლასზე, რომელიც პროევროპული ორიენტაციისაა, მაგრამ მოლოდინია, რომ იქნება ევროპული თავის ქმედებებსა და გადაწყვეტილებებში".

"ყველა ჩვენი ლიდერი ამბობს, ვიყოთ პროევროპელები, თუმცა თქმა საკმარისი არ არის, საჭიროა რომ ვიყოთ", — ამის შესახებ ნატალია საბანაძემ თანამდებობის დატოვების შემდეგ ფრანგულ გამოცემა Le Monde-სთან ისაუბრა.

როგორც გამოცემა წერს, ფეისბუქპოსტში, რომლითაც საბანაძემ გადადგომაზე ინფორმაცია გაავრცელა, მიზეზებზე საჯაროდ არ უსაუბრია. მათთან საუბრისას კი აღნიშნა, რომ ბოლო კვირების განმავლობაში "საქართველოს მთავრობასთან უთანხმოება" ჰქონდა.

"ამის მიუხედავად დიპლომატს არ სურს ჩაუღრმავდეს დეტალებს რათა არ გაართულოს სიტუაცია", — წერს გამოცემა.

ნატალია საბანაძემ ევროკავშირთან საქართველოს მისიის ხელმძღვანელისა და ბელგიასა და ლუქსემბურუგში საქართველოს ელჩის თანამდებობა 21 მარტს დატოვა. მისი თქმით, გადადგომის მიუხედავად, საქართველოს ევროპული მომავლისთვის ყოველთვის იბრძოლებს. 22 მარტს, მან ტვიტერზე იმედი გამოთქვა, რომ მმართველ პარტიასა და ოპოზიციას შორის მოლაპარაკებები გაგრძელდება. მისივე თქმით, საქართველო გახანგრძლივებულ კრიზისს ვერ გაუძლებს.

გაიგეთ მეტი: