ჟურნალისტი ირაკლი მამალაძე ტელეკომპანია იბერიასთან საუბრისას აცხადებს, რომ ის დეკანოზ გიორგი მამალაძის საქმის მოწმეა:

"მე მაქვს გაუხმაურებლობაზე ხელი მოწერილი და ვარ ერთ-ერთი მოწმე. საქმეში არის უამრავი მტკიცებულება. რაც შეეხება, რომ მე ჩავწერე თუ ვინ ჩაწერა, თუ ეს იყო ღონისძიება თუ რა, ეს საბოლოოდ გამოჩნდება, როცა გამოძიება გამოაქვეყნებს მტკიცებულებებს. მე იმას არ გავაეთებდი, რაც რეალობასთან ახლოს არ არის და არავის დაგეგმილ სცენარში არ მივიღებდი მონაწილეობას. როცა ზოგი პოსტებს წერდა და ეძინა, რამდენიმე მოქალაქეს არ ეძინა და მთელი სახელმწიფო უწყება იდგა თავის სიმაღლეზე და აიცილა უმძიმესი დანაშაული".

ტელეკომპანია იბერიას ინფორმაციით, პროკურატურის გადაწყვეტილებით, ირაკლი მამალაძეს სახელმწიფო დაცვა დაენიშნა.

მთავარი პროკურატურის ცნობით, 2017 წლის 10 თებერვალს, მკვლელობის მომზადების ბრალდებით დეკანოზი გიორგი მამალაძე დააკავეს. პროკურატურის მტკიცებით, გიორგი მამალაძე აპირებდა გერმანიაში გამგზავრებას, სადაც პატრიარქი იმყოფებოდა სამკურნალოდ. უწყების განცხადებით, უცნობმა პირმა მიმართა პროკურატურას და მიუთითა, რომ მამალაძეს უნდა მოეხდინა მაღალი იერარქიის სასულიერო პირის სიცოცხლის ხელყოფა.