გირჩის ერთ-ერთი ლიდერის, იაგო ხვიჩიას განცხადებით, როცა ოპოზიციის 15 მაისის აქციის შესახებ მოისმინა, შთაბეჭდილება დარჩა, რომ ოპოზიციური სპექტრი დაიღალა და "შვებულებაში გავიდა". ამის შესახებ მან Postv-ის ეთერში ისაუბრა და ასე უპასუხა წამყვანის კითხვას — რატომ 15 მაისი?

"ვერ გეტყვით, თქვენ იცით, რომ ჩვენი კოლეგები არ გველაპარაკებიან, გაბუტულები არიან და ინფორმაცია არა მაქვს. მე უბრალოდ, როდესაც მოვისმინე ეს ამბავი და მათ შორის, ყველა კომენტარი, რაც გაკეთდა, დამრჩა შთაბეჭდილება, რომ ქართული ოპოზიციური პოლიტიკური სპექტრი დაიღალა და 2-თვიან შვებულებაში გავიდა.

მე ასეთი შთაბეჭდილება დამრჩა. თვითონ საწინააღმდეგო არაფერი არ უთქვამთ. ამბობენ, ხალხს შევხვდებით რეგიონებში და იქედან ჩამოვიყვანთ 15 მაისისთვის, ამდენი დრო დაგვჭირდება ამის გასაკეთებლადო და მე, როგორც გითხარით, ცოტა სკეპტიკური ვარ ამ თვალსაზრისით და უბრალოდ მგონია, რომ ხალხს დასვენება სჭირდება", — თქვა ხვიჩიამ.

ხვიჩიას თქმით, ოპოზიციის საერთო აქციებში გირჩი მონაწილეობას არ მიიღებს და მათ საკუთარი გზა ექნებათ.

20 მარტს ოპოზიციამ საკუთარი სამოქმედო გეგმა დააანონსა. ნაციონალური მოძრაობის ერთ-ერთმა წევრმა, ზაალ უდუმაშვილმა თქვა, რომ ისინი მუშაობის "საგანგებო რეჟიმზე" გადადიოდნენ. მისი განცხადებით, აპირებენ ქალაქებსა და სოფლებში ჩასვლას, რათა დაარწმუნონ მოსახლეობა, "რომ ბრძოლას აქვს აზრი". ამასთან, უდუმაშვილი აღნიშნავს, რომ ჩატარდება არაერთი აქცია, მათ შორის, 15 მაისს დიდი აქცია გაიმართება თბილისში.