სერიალ American Horror Story-ის გულშემატკივრების სასიხარულოდ, მისი შემქმნელის, რაიან მერფის ახალ პროექტში — Monster: The Jeffrey Dahmer Story მთავარ როლს ევან პიტერსი შეასრულებს. ევან პიტერსი ფართო საზოგადოებამ სწორედ ამერიკული საშინელებათა ისტორიის პირველი სეზონით გაიცნო, სადაც ის ერთ-ერთ მთავარ როლს ასრულებდა. მსახიობი სერიალის მომდევნო სეზონებშიც აქტიურად მონაწილეობდა. ევან პიტერსი მაყურებლებმა პიტერ მაქსიმოფის როლშიც იხილეს ფილმებში Dark Phoenix, Deadpool 2, X-Men: Apocalypse და X-Men: Days of Future Past. მსახიობი სერიალებში WandaVision და Pose-შიც მონაწილეობდა.

American Horror Story: Murder House

ფოტო: Giphy

რაიან მერფისა და იან ბრენანის ახალი სერიალი Monster: The Jeffrey Dahmer Story ამერიკის ერთ-ერთ ყველაზე ცნობილ სერიულ მკვლელზე მოგვითხრობს. ევან პიტერსი სერიალში სწორედ ჯეფრი დამერს განასახიერებს. ჯეფრი დამერის მეზობლის, გლენდა კლივლენდის როლს მსახიობი ნეისი ნეში, სერიული მკვლელის დედის როლს კი — პენელოპა ენ მილერი შეასრულებს.

სერიალში ნაჩვენები იქნება პოლიციის უმოქმედობა და არაკომპეტენტურობა, რაც სერიულ მკვლელს 13 წლის განმავლობაში დანაშაულის ჩადენას უმარტივებდა. მასალებში დაახლოებით 10 შემთხვევაა, როცა ჯეფრი დამერი თითქმის დაიჭირეს, თუმცა საბოლოოდ მაინც გაუშვეს. Monster: The Jeffrey Dahmer Story, სავარაუდოდ, ამერიკაში თეთრკანიანების პრივილეგიის პრობლემასაც შეეხება, რადგან დამერი მარტივად უძვრებოდა კანონს თავისი გარეგნობისა და მოწესრიგებულობის გამო.

სერიალი 10 ეპიზოდისგან შედგება. საპილოტე ეპიზოდს Mindhunter-ის ერთ-ერთი რეჟისორი კარლ ფრანკლინი გადაიღებს. სერიალზე, აგრეთვე, ჯენეტ მოკი და დევიდ მაკმილანი იმუშავებენ.

ამავე თემაზე: