ჯანდაცვის მინისტრის, ეკატერინე ტიკარაძის განცხადებით, მესამე ვაქცინა, რომელიც საქართველოში შემოვა ჩინური იქნება. მისი თქმით, ის ხელმისაწვდომი უახლოეს მომავალში გახდება. ამის შესახებ მან იმედის ეთერში ისაუბრა.

"შემდეგი არის ჩინური ვაქცინა, რომლითაც მე უნდა ავცრილიყავი, ვინაიდან ჩინურთან მიმართებაში არაერთი კითხვა არსებობს და იყვნენ ადამიანები, რომლებიც წინააღმდეგნი იყვნენ ჩინური ვაქცინის შემოტანის, თუმცა აქ ჩვენ დავიცავით პრინციპი, რომ უნდა იყოს მკაცრი მარეგულირებლის მხირდან აღიარებული.

ეს ვაქცინა ამ ეტაპისთვის არის აღიარებული მკაცრი მარეგულირებლის მხრიდან, შესაბამისად, ჩვენ გვაქვს იმის საფუძველი, რომ ვაქცინა ჩავთვალოთ გამოყენებისთვის უსაფრთხოდ. აქედან გამომდინარე, ჩინური ვაქცინაც ხელმისაწვდომი იქნება უახლოეს მომავალში", — თქვა მან.

საქართველოში პირველი ვაქცინა 13 მარტს შემოვიდა. AstraZeneca-ს ვაქცინის 43 200 დოზა შაბათს დილით ჩამოიტანეს. პროცესში პირველები ჯანდაცვის სფეროს წარმომადგენლები, ანუ ყველაზე უფრო რისკჯგუფში მყოფი ადამიანები ჩაერთნენ. მომდევნო იქნება Pfizer-ი. ტიკარაძის განცხადებით, მას ქვეყანა 24 მარტს მიიღებს.