ჯანდაცვის მინისტრის მოადგილე, თამარ გაბუნია არ გამორიცხავს, რომ ვაქცინაციის პროცესში ჩართვის შესაძლებლობა ახალ ჯგუფს — 55 წლის ზევით ასაკის მოქალაქეებსაც მისცენ. მისი თქმით, ეს ჯგუფების აქტივობაზე იქნება დამოკიდებული.

"არ გამოვრიცხავთ, ყველაფერი შესაძლებელია. ეს დამოკიდებულია ჯგუფების აქტივობაზე.

ჩვენთვის მთვარია, რომ ვაქცინის ის რაოდენობა, რაც მივიღეთ და ძვირფასია, მიზნობრივად გამოვიყენოთ. თუ დაბალი აქტივობა იქნება, ვიფიქრებთ შემდეგი ჯგუფის მოცვაზე. ვფიქრობ, პირველ ეტაპზე მაქსიმალურად მოხერხდება ასაკობრივი ჯგუფებისა და სამედიცინო პერსონალის მოცვა იმ მასშტაბით, რაც თავიდანვე გვქონდა დაგეგმილი. შემდეგ, როცა აპრილიდან და მაისიდან დამატებითი დოზები გაჩნდება, რა თქმა უნდა, ვფიქრობ, რომ 55 წლის ზემოთ და სხვა ჯგუფები ავცრათ. მეორე კვარტლის ბოლოა მითითებული იმისთვის, რომ არარისკჯგუფის მოსახლეობა მოხვდეს ვაქცინაციის პროგრამაში. მესამე და მეოთხე კვარტალი იყო დაგეგმილი ფართო ვაქცინაციისთვის", — განაცხადა გაბუნიამ პალიტრანიუსის დღის ნიუსრუმში.

ვაქცინაციის ეროვნული გეგმის მიხედვით, თავდაპირველად სამედიცინო სფეროში დასაქმებულების აცრა იყო დაგეგმილი, შემდეგ კი 65 წელს ზევით მყოფი მოქალაქეების.

საქართველოში მედპერსონალის ვაქცინაცია AstraZeneca-ს ვაქცინით 15 მარტიდან დაიწყო.