პარტია მოქალაქეების ლიდერი, ალეკო ელისაშვილი მიიჩნევს, რომ ყოფილი პრემიერმინისტრის გიორგი გახარიას ოპოზიციაში წასვლით პოლიტიკური ცხოვრება უფრო საინტერესო იქნება. ამის შესახებ მან ჟურნალისტებს პარლამენტში განუცხადა.

"რამდენადაც მე ვიცი, გახარია ფიქრობს პარტიის შექმნას და გარკვეულ კონსულტაციებს, რამდენადაც ვიცი, აწარმოებს. უფრო საინტერესო გახდება ქართული პოლიტიკური ცხოვრება გახარიას ოპოზიციაში წასვლის შემდეგ და თუ ვიხილავთ მას კიდევ ერთი ოპოზიციური პარტიის ლიდერად. ის სერიოზული ფიგურა იყო. შეძლებს თუ არა ის სერიოზული ფიგურა იყოს უკვე ოპოზიციაში, ამას დრო გვაჩვენებს. მანამდე ყველაფერი უმადური ნაცრის ქექვა იქნება", — აღნიშნავს ელისაშვილი.

პრემიერობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს. ტელევიზიით გასულ კადრებში ჩანს, რომ გახარია მთავრობის ადმინისტრაციის ყოფილ ხელმძღვანელთან, კახაბერ ქემოკლიძესთან და პარლამენტში ქართული ოცნების დეპუტატთან, მიხეილ დაუშვილთან ერთად იყო.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

მოგვიანებით, პოლიტიკაში დარჩენის შესახებ მან ფეისბუქზე დაწერა.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიამ მაშინ განაცხადა, რომ მისი ურყევი პოზიციაა, "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".