17 მარტს საქართველოს ეროვნულ ბოტანიკურ ბაღში სომხური წარმოშობის ლეგენდარული ქართველი რეჟისორის, სერგო ფარაჯანოვის სახელობის ბროწეულის ხე დაირგო.

ხე სიმბოლურად რეჟისორ ხოსე მაჯინერეს ორგანიზებით თბილისში მდებარე ბოტანიკური ბაღის განსაკუთრებულ ხეივანში — ტონინო გუერას "დავიწყებულ ხეხილის ბაღში" დარგეს.

ფოტო: საქართველოს ეროვნული ბოტანიკური ბაღი

ფოტო: საქართველოს ეროვნული ბოტანიკური ბაღი

იტალიელი ხელოვანის ტონინო გუერას სახელობის "დავიწყებულ ხეხილის ბაღის" აქტიურად გაშენება 2020 წელს დაიწყო: იქ სხვადასხვა მცენარეს კულტურისა და ხელოვნების სფეროში მოღვაწე მნიშვნელოვანი პირების პატივსაცემად რგავენ.

საქართველოს ეროვნული ბოტანიკური ბაღის ინფორმაციით, სერგო ფარაჯანოვის სახელობის ბროწეული ხის დარგვის ღონისძიებას სომხეთის სამოციქულო ეკლესიის ქორეპისკოპოსი, სომხეთის საელჩოს წარმომადგენლები, ოვანეს თუმანიანის სახლ-მუზეუმის დირექტორი და სხვა მოწვეული სტუმრები ესწრებოდნენ.

ფოტო: საქართველოს ეროვნული ბოტანიკური ბაღი

ფოტო: საქართველოს ეროვნული ბოტანიკური ბაღი

ფარაჯანოვის შემოქმედების მოყვარულებმა კარგად იციან, რომ რეჟისორი თავის ფილმებში ბროწეულს ძალიან ხშირად იყენებდა და განსაკუთრებულ დატვირთვასაც ანიჭებდა.

კადრი ფილმიდან ბროწეულის ფერი.

ფოტო: The Criterion

სერგო ფარაჯანოვი XX საუკუნის ერთ-ერთი ყველაზე მნიშვნელოვანი საბჭოთა კინოხელოვანია, რომელიც თბილისში დაიბადა და გაიზარდა. მან თავისი ისეთი ცნობილი კინოსურათებით, როგორებიცაა აშუღი ქერიბი, ბროწეულის ფერი თუ მივიწყებულ წინაპართა აჩრდილები, შემდგომში უამრავ ხელოვანზე მოახდინა უდიდესი გავლენა.

ასევე იხილეთ: