ალბათ, ჰარი პოტერის ფილმების ერთგული მაყურებლების უმრავლესობა ბევრ რამეს დათმობდა, საყვარელი გმირების როლებში ისევ რომ ეხილათ უკვე კარგად ნაცნობი და ძვირფასი სახეები.

რუპერტ გრინტმა სწორედ ამის ალბათობაზე ისაუბრა.

რონ უიზლის როლის შემსრულებელმა Esquire-თან ინტერვიუში განაცხადა, რომ ჰარი პოტერის ჯადოსნური სამყაროს შესახებ გადაღებულ კიდევ ერთ ფილმში მონაწილეობა მხოლოდ იმ შემთხვევაში ენდომება, თუ ამის სურვილს სხვა ისეთი მსახიობებიც გამოთქვამენ, როგორებიც ემა უოტსონი და დენიელ რედკლიფი არიან.

"ამ როლის ახლა ისევ შესრულება... არა, ამის წარმოდგენაც კი მიჭირს. მაგრამ მაინც, არასოდეს თქვა არასოდეს. ეს მხოლოდ იმ შემთხვევაში იქნება შესაძლებელი, თუ სხვებსაც ენდომებათ იმავეს გაკეთება. თუმცა, ჰო, ჯობია, ყველაფერი ისევ ისე დარჩეს", — ამბობს გრინტი.

დენიელ რედკლიფი, ემა უოტსონი და რუპერტ გრინტი.

ფოტო: Gareth Cattermole / Getty Images

რუპერტ გრინტმა იმ უნიკალურ გამოცდილებაზეც ისაუბრა, რომელიც სხვა მსახიობებთან ერთად ჰარი პოტერის ფილმების შექმნაში მონაწილეობამ შესძინა.

"ის ყველაფერი, რაც ჩვენ გამოვიარეთ, ძალიან განსაკუთრებული იყო და ამის რეალურ მნიშვნელობას ჩვენ გარდა ვერავინ გაიგებს. ეს ასტრონავტების გამოცდილებას ჰგავდა, უცნაურ ექსპერიმენტს" — აღნიშნა მან.

ფოტო: Dave Hogan / Getty Images

რუპერტ გრინტი ათი წლის განმავლობაში იყო ამ ჯადოსნური სამყაროს ნაწილი: მან რვავე ფილმში ერთ-ერთი მთავარი როლი შეასრულა. მიუხედავად ნოსტალგიური მოგონებებისა, მსახიობი ხშირად იმ სირთულეებზეც საუბრობს, რომლებიც ამ გამოცდილებამ მოუტანა.

"ცხადია, ეს შესანიშნავი გამოცდილება იყო. რადგანაც მთელ პროექტზე ძირითადად ერთი შემოქმედებითი გუნდი მუშაობდა, ოჯახური ატმოსფერო იყო და მათ გარემოცვაში ყოფნაც სასიამოვნო იყო. მაგრამ ამავდროულად ვგრძნობდი, რომ სხვა რამის გაკეთებაც მინდოდა. მინდოდა გამეგო, რა ხდებოდა ამ ყველაფრის მიღმა. ისეთი შეგრძნება მქონდა, რომ ეს უბრალოდ არასდროს დასრულდებოდა: ყოველ წელს კვლავ იქიდან ვიწყებდით, სადაც დავასრულეთ. ეს ზაზუნას დღეს ჰგავდა: იგივე ადგილი, იგივე ხალხი. თუმცა ყველაფერი მაინც დიდებული იყო და მსიამოვნებდა ამის კეთება", — ისაუბრა მან ერთ-ერთ პოდკასტში.

ჰარი პოტერის შემდეგ ის არაერთ სატელევიზიო შოუში გამოჩნდა: Servant, Snatch, Sick Note, და The ABC Murders. თუმცა ისიც ცხადია, რომ მილიონობით მაყურებლისთვის მუდამ რონ უიზლად დარჩება.

ფოტო: Warner Bros.