პატრიარქის მდივანმა მიქაელ ბოტკოველმა TV პირველის ეთერში განაცხადა, რომ მან არ იცის, რას ფიქრობს ილია მეორე დეკანოზის დაკავებასთან დაკავშირებით, რადგან მას პირადად პატრიარქის აზრი ამ თემასთან დაკავშირებით არ მოუსმენია:

"მე მოვისმინე ბერლინში მასთან მყოფი მღვდელმთავრების განცხადებები, ხოლო პატრიარქი თვითონ რას ფიქრობს, არა".

ბოტკოველი აცხადებს, რომ ილია მეორე ერთ კვირაში საქართველოში ჩამოვა და იმედის გამოთქვამს, რომ ის აღნიშნულ საქმეს ჩაუღრმავდება და პროკურატურასთან ითანამშრომლებს.

პატრიარქის მდივანმა ასევე ისაუბრა რუსთავი 2ის მიერ გამოქვეყნებულ, სავარაუდოდ, დეკანოზ გიორგი მამალაძის მიერ დაწერილ წერილზე და თქვა, რომ შესაძლოა ის მართლა დეკანოზ გიორგი მამალაძეს ეკუთვნის:

"საკითხები, რომლებიც ამ წერილშია, ნამდვილად შედიოდა მამა გიორგის განსახილველ საქმეებში, და ამას მტკიცებულება სჭირდება და იმედია დეკანოზ მამალაძეს მიეცემა საშუალება, დაადასტუროს ან უარყოს წერილის შესახებ ინფორმაცია, მაგრამ, თემატიკიდან გამომდინარე, დიდი ალბათობით, ეს შეიძლება იყოს მისი წერილი, რადგანაც იქ ისეთი საკითხებია, რომლებთანაც მას პირდაპირი თუ არაპირდაპირი შემხებლობა ჰქონდა".

თუმცა, ბოტკოველი დასძენს, რომ წერილში ასახული ბევრი საკითხი "ძალიან დრამატიზირებულია", ის ასევე ეჭვქვეშ აყენებს იმ ფაქტს, რომ დეკანოზ გიორგი მამალაძეს პატრიარქ ილია მეორესთან წერილის სახით კომუნიკაცია დასჭირდა.

ბოტკოველის თქმით, მას ჰქონდა ინფორმაცია, რომ დეკანოზ გიორგი მამალაძეს პატრიარქის ადმინისტრაციასთან, მათ შორის პირადად მასთან, დაკავშირებით ჰქონდა კითხვები, რასთან დაკავშირებითაც ის პირადად ილია მეორეს ესაუბრა, და უთხრა, რომ თუ მას უკავშირებდნენ საპატრიარქოს ქონების შესახებ არსებულ ეჭვებს, ის მზად იყო თავისი თანამდებობა დაეტოვებინა. მისი თქმით, აღნიშნულზე ილია მეორემ უთხრა, რომ მას თავისი საქმიანობა უნდა გაეგრძელებინა.