გარდაცვლილი ექთნის, მეგი ბაქრაძის ოჯახი ალტერნატიული ექსპერტიზის ცატარებას აპირებს. ადვოკატის, ვახტანგ ბარამაშვილის თქმით, გარდაცვლილი ქალის ქმარი დაზარალებულის უფლებამონაცვლის სტატუსს მიიღებს და უახლოეს დღეებში საქმის მასალებსაც გაეცნობიან.

რაც შეეხება ალტერნატიულ ექსპერტიზას, ადვოკატმა TV პირველის ეთერში განმარტა, რომ ეს იქნება ალტერნატიული ექსპერტების მოსაზრება სამხარაულის ბიუროს დასკვნაზე.

"აქ არ არის ნდობა-არნდობაზე [საუბარი]. ამ წუთისთვის შემიძლია გითხრათ, რომ გამოძიება დაინტერესებულია გამოძიების პროცესით და როგორც თვითონ აცხადებენ, ინტენსიურად მიმდინარეობს ეს პროცესი. აქ არის საუბარი იმაზე, რომ ალტენრატიული ექსპერტიზის შეხედულება გვქონდეს. თუ ეს დასკვნები ერთმანეთს დაემთხვევა, რა თქმა უნდა, ზუსტად გვეცოდინება რა ხდება. თუ არ დაემთხვა, გვეცოდინება, რომ ფართო სურათში უნდა ვეძებოთ", — აღნიშნავს ვახტანგ ბარამაშვილი.

18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. ბრიფინგზე ჯანდაცვის მინისტრის მოადგილემ და NCDC-ის დირექტორმა აღნიშნეს, რომ ქალს განუვითარდა ანაფილაქსიური შოკი და შესაძლოა, ეს იყოს ვაქცინის გვერდითი ეფექტი, თუმცა ამის დასადგენად მიმდინარეობს კვლევა.

გაბუნიამ აღიშნა ისიც, რომ AstraZeneca-ს ვაქცინას მსგავსი გვერდით რეაქცია აქვს უკვე დაფიქსირებული — ბრიტანეთის მონაცემებით, 5 მილიონი შემთხვევიდან 41 იყო მსგავსი ანაფილაქსიური გვერდითი რეაქცია. მანვე აღნიშნა, რომ ვაქცინის რისკი მის სარგებელთან შედარებით ყოველთვის ნაკლებია.

19 მარტს ჯანდაცვის სამინისტროს გადაწყვეტილებით, ვაქცინაციის პროცესი მხოლოდ მრავალპროფილურ კლინიკებში გაგრძელდება.

ამავე თემაზე: