ჯანდაცვის მინისტრის ეკატერინე ტიკარაძის თქმით, ექთნის მდგომარეობა კრიტიკულად მძიმეა, თუმცა არა უიმედო.

"მნიშვნელოვანია აღვნიშნოთ, რომ შემდეგი 24 საათი არის კრიტიკულად მნიშვნელოვანი პაციენტის დინამიკის განვითარებისთვის და უნდა დაველოდოთ შემდეგ მოვლენებს. ამ ეტაპისთვის პაციენტის მდგომარეობა არის კრიტიკულად მძიმე, თუმცა არა უიმედო", — განაცხადა ტიკარაძემ.

მისი განცხადებით, ვაქცინაციის გვერდითი მოვლენების გამოვლენის შემთხვევაში, ჯანდაცვის სექტორს აქვს ყველა საჭირო პროტოკოლი. ამის შესახებ მან კონსილიუმის დასრულების შემდეგ განაცხადა, სადაც ახალციხელი ექთნის მკურნალობის კურსზე იმსჯელეს.

"ჯანდაცვის სექტორი, როგორც ამ შემთხვევაში, ასევე, სხვა შემთხვევაში არის სრულიად მობილიზებული და მათ აქვთ ყველა საჭირო პროტოკოლი, რომ მაქსიმალურად დაცული იყოს ყველა გართულება. მსგავს შემთხვევებს, არამხოლოდ ვაქცინაციის, არამედ სხვა პერიოდშიც აქვს ადგილი და საქართველოს სტატისტიკით ეს რიცხვი სხვადსხვა წლის ჭრილში მერყეობს 60-და 80-მდე. მნიშვნელოვანია, რომ ექიმებმა გამოიყენონ ის უნარ-ჩვევები, რაც გააჩნიათ", — განაცხადა მან.

დღეს, 18 მარტს გავრცელდა ინფორმაცია, რომ ახალციხეში ექთანი AstraZeneca-ს ვაქცინის გაკეთების შემდეგ კომაში ჩავარდა. მოგვიანებით გაირკვა, რომ მას სავარაუდოდ, ანაფილაქსიური რეაქცია ჰქონდა.

ბრიფინგზე ჯანდაცვის მინისტრის მოადგილემ და NCDC-ის დირექტორმა აღნიშნეს, რომ, შესაძლოა, ეს იყოს ვაქცინის გვერდითი ეფექტი, თუმცა ამის დასადგენად მიმდინარეობს კვლევა.

გაბუნიამ აღიშნა ისიც, რომ ასტრაზენეკას ვაქცინას მსგავს გვერდით რეაქცია აქვს უკვე დაფიქსირებული — ბრიტანეთის მონაცემებით, 5 მილიონი შემთხვევიდან 41 იყო მსგავსი ანაფილაქსიური გვერდითი რეაქცია. მანვე აღნიშნა, რომ ვაქცინის რისკი მის სარგებელთან შედარებით ყოველთვის ნაკლებია.

ამავე თემაზე: