ჯანდაცვის მინისტრის, ეკატერინე ტიკარაძის თქმით, საპატრიარქოში შეხვედრისას მისი თხოვნა იყო, რომ ლოცვებისას და ქადაგებებისას მოსახლეობას ნიღბის ტარებისკენ და დისტანციის დაცვისკენ მოუწოდონ. ამის შესახებ მან საპატრიარქოში შეხვედრის დასრულების შემდეგ განაცხადა.

"ჩემი მხრიდან თხოვნა შეეხებოდა სოციალურ დისტანციასა და ნიღბების ტარებას და ამის მეტად მოწოდებას როგორც ლოცვებში, ასევე სხვადასხვა ქადაგებაში. თვითონ სინოდისთვისაც მნიშვნელოვანი იყო ეს პოზიცია, რომელიც ჩვენი მხრიდან გაჟღერდა. ასევე, მნიშვნელოვანია, საპატრიარქოს ჰქონდეს დეტალური ინფორმაცია, თუ რა საფუძველს ემყარება ჯანდაცვის სამინისტროს გადაწყვეტილებები ამა თუ ამ ვაქცინის შერჩევასთან დაკავშირებით, რამდენად უსაფრთხოა ის მოსახლეობისთვის, რა ტექნოლოგიებს ემყარება ვაქცინაცია და რამდენად შეიძლება იყოს ერთადერთი გამოსავალი, რომ დავძლიოთეს გლობალური გამოწვევა", — აღნიშნა ჯანდაცვის მინისტრმა.