ნაციონალური მოძრაობის ერთ-ერთი ლიდერის, სალომე სამადაშვილის განცხადებით, ვადამდელი არჩევნების მოთხოვნა ოპოზიციის მხრიდან იმ რეალობას ეფუძნება, რომ ქვეყანა პოლიტიკურ კრიზისშია შესული.

"ვადამდელი არჩევნების მოთხოვნა ოპოზიციის მხრიდან ეფუძნება იმ რეალობას, რომ ქვეყანა არის უმწვავეს პოლიტიკურ კრიზისში შესული, რაც დაადასტურა იმან, რომ ქართული ოცნები საკუთარი პრემიერმინისტრი გადადგა თანამდებობიდან არჩევნებიდან რამდენიმე თვეში. ნებისმიერ ევროპულ სახელმწიფოში არჩევნებიდან რამდენიმე თვეში პრემიერმინისტრის გადადგომა ნებისმიერ საპარლამენტო ევროპულ სახელმწიფოში გამოიწვევდა დღის წესრიგში ვადამდელი არჩევნების ჩატარების აუცილებლობის საკითხს", — განაცხადა სამადაშვილმა.

საქართველო-ევროკავშირის ასოცირების საბჭოს მე-6 შეხვედრის შემდგომი ერთობლივი განცხადება გავრცელდა, რომელშიც აღნიშნულია საქართველოს წარმატებები და დაბრკოლებები ევროინტეგრაციისკენ მიმავალ გზაზე. განცხადებაში განხილულია ქვეყანაში მიმდინარე პოლიტიკური პროცესები და მისი მოგვარების აუცილებლობაზეა საუბარი.

ასოცირების საბჭომ აღნიშნა, რომ 2020 წლის 31 ოქტომბრისა და 21 ნოემბრის არჩევნები კონკურენტული იყო და რომ, მთლიანობაში, დაცული იყო ფუნდამენტური თავისუფლებები. ამავდროულად, ასოცირების საბჭო შეთანხმდა, რომ მნიშვნელოვანია საერთაშორისო დამკვირვებლების, მათ შორის, ეუთოს დემოკრატიული ინსტიტუტებისა და ადამიანის უფლებების ოფისის (OSCE/ODIHR) მიერ გამოვლენილ ხარვეზებთან დაკავშირებით გაცემული ყველა რეკომენდაციის გათვალისწინება.