15 მარტს ამერიკის კინოაკადემიამ ოსკარების 2021 წლის ნომინანტები დაასახელა და მათ შორის მოხვდა ფილმი, რომლის შექმნაში მონაწილეობა ქართულმა კომპანიამაც მიიღო.

A Concerto Is A Conversation-ზე, რომელიც მოკლემეტრაჟიანი კინოსურათების ხუთ ფინალისტ შორის დასახელდა, ქართული აუდიო პოსტ ფროდაქშენი Postred მუშაობდა.

ამ სასიხარულო ამბის შესახებ ინფორმაცია ქართულმა სტუდიამ ფეისბუქგვერდზე გამოაქვეყნა და ფილმის მთელ შემოქმედებით გუნდს მიულოცა წარმატება.

A Concerto Is A Conversation ცამეტწუთიანი დოკუმენტური ნამუშევარია, რომელიც ვირტუოზი ჯაზმუსიკოსისა და მისი 91 წლის ბაბუის შესახებ მოგვითხრობს: კინოსურათის გმირები ცდილობენ, თავიანთი წარმომავლობა შეისწავლონ და წარსულში ერთგვარი მოგზაურობა მოიწყონ.

ოსკარის წლევანდელი ნომინანტების სრული სია შეგიძლიათ იხილოთ ამ ბმულზე.

93-ე დაჯილდოების ცერემონია 26 აპრილს გაიმართება და გამარჯვებულების ვინაობაც სწორედ მაშინ გახდება ცნობილი.