სახალხო დამცველი, უჩა ნანუაშვილი სოფელ ხურჩაში მომხდარ მკვლელობას ეხმაურება და განმარტავს, რომ მომხდარზე საერთაშორისო სამართლებრივი პასუხისმგებლობა რუსეთის ფედერაციას, როგორც რეალური კონტროლის განმახორციელებელ სახელმწიფოს ეკისრება. გარდა ამისა, ნანუაშვილი ამბობს, რომ გამყოფი ხაზის პირას მაცხოვრებლების უფლებები სათანადოდ დაცული არ არის :

"რუსეთის ფედერაცია სასაზღვრო ჯარების მეშვეობით სრულად აკონტროლებს აფხაზეთის გამყოფი ხაზის მთელ პერიმეტრს".

ომბუდსმენის თქმით, სოფელ ხურჩაში ადგილობრივების უფლებები განსაკუთრებული საფრთხის ქვეშ არის:

"სოფელ ხურჩაში საქართველოს პოლიციის საგუშაგო სოფლის დასაწყისშია, სოფლის ბოლოს კი რუსულ-აფხაზური ე.წ. გამშვები პუნქტია განლაგებული. ადგილობრივი მოსახლეობა რუს და აფხაზ სამხედროებთან პირისპირ მარტო არის დარჩენილი".

სახალხო დამცველი ასევე განმარტავს, ვინაიდან მკვლელობა ქართული მხარის მიერ კონტროლირებად ტერიტორიაზე მოხდა, აღნიშნული კი ადგილობრივთა დაუცველობას: ხაზს უსვამს

"ხიდს, სადაც მოხდა მკვლელობა, ყოველდღიურად გადაკვეთენ მოქალაქეები, მათ შორის სკოლის მოსწავლეები. ისინი ყოველდღიურად რისკის ქვეშ აყენებენ თავიანთ სიცოცხლეს განათლების, ჯანდაცვის თუ სხვა საბაზისო საჭიროებების დასაკმაყოფილებლად".

სახალხო დამცველი უსამძიმრებს გარდაცვლილის ოჯახის წევრებს და მოუწოდებს ყველა მხარეს თანამშრომლობისაკენ, რათა სწრაფად და ეფექტურად მოხდეს აღნიშნული მკვლელობის გამოძიება. სახალხო დამცველი ასევე რეკომენდაციით მიმართავს ქართულ და აფხაზურ მხარეებს, ეს ინციდენტი საფუძვლად დაუდონ უახლოეს მომავალში გალში ინციდენტების პრევენციისა და მათზე რეაგირების მექანიზმის განახლებული შეხვედრის ჩატარებას.