პროკურატურამ ერთიანი ნაციონალური მოძრაობის გორის რაიონული ორგანიზაციის ქონების დაზიანების ფაქტზე დაკავებულ ოთხივე პირს პატიმრობა შეუფარდა.

უწყების ცნობით, შინაგან საქმეთა სამინისტროს მიერ ჩატარებული გამოძიების შედეგად დადგინდა, რომ 2 მარტს, ნასვამ მდგომარეობაში მყოფმა ოთხმა პირმა შეუწყნარებლობის მოტივით, გორში გარსევანიშვილის ქუჩაზე მდებარე ენმ-ს რაიონული ორგანიზაციის ქონება დააზიანა, რამაც 1 500 ლარის ქონებრივი ზიანი გამოიწვია.

მათივე ინფორმაციით, დაკავებულებს ბრალდება საქართველოს სისხლის სამართლის კოდექსის 187-ე მუხლის პირველი ნაწილით წარედგინათ, რაც სასჯელის სახედ და ზომად ერთიდან სამ წლამდე თავისუფლების აღკვეთას ითვალისწინებს.

პროკურატურამ ოთხივე ბრალდებულისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა.

უწყებაში აცხადებენ, რომ სისხლის სამართლის საქმეზე გამოძიება გრძელდება.

გორში ნაციონალური მოძრაობის ოფისი 2 მარტს დააზიანეს. პარტიის პრესსამსახურის მოწოდებულ კადრებში ჩანს, რომ დამტვრეულია მინა, კარები და ოფისის ავეჯი. ასევე, შიდა სივრცეში ჩანს დიდი ზომის ქვები. პარტიაში აცხადებენ, რომ ეს ამ ოფისზე თავდასხმის უკვე მეხუთე შემთხვევაა.