სერიალ Friends-ის (მეგობრები) მაყურებლებისთვის კარგად ნაცნობმა მსახიობმა, დევიდ შვიმერმა ცოტა ხნის წინ მიცემულ ინტერვიუში გაამხილა, რომ სულ მალე ნანატრი სპეციალური ეპიზოდის გადაღებები დაიწყება.

ამ საკულტო სიტკომში როს გელერის როლის შემსრულებელმა თქვა, რომ კამერის წინ მუშაობას აპრილში შეუდგებიან:

"დაახლოებით ერთ თვეში ლოს-ანჯელესში მივემგზავრები. ვიპოვეთ გზა, რომ გადაღებები უსაფრთხოდ დაიწყოს და ამის გამო მეტ წილად გარე სივრცე შევარჩიეთ. ხომ გესმით, უსაფრთხოების პროტოკოლის გამო", — აღნიშნა მან ენდი კოენის რადიოშოუში სტუმრობისას.

ჯერ კიდევ 2020 წლის დასაწყისში დადასტურდა, რომ ერთ-ერთი ყველაზე პოპულარული სატელევიზიო შოუს გმირები ეკრანზე ბრუნდებოდნენ და მას შემდეგ ერთგული ფანები როგორც მის ხილვას, ისე პროექტთან დაკავშირებულ დეტალებს გაფაციცებული ელოდებიან.

როგორც ცნობილია, მომავალ ეპიზოდში კვლავ ვიხილავთ მთავარი როლის შემსრულებელ მსახიობებს: ჯენიფერ ენისტონს, კორტნი კოქსს, ლიზა კუდროუს, მეთ ლებლანკს, მეთიუ პერისა და დევიდ შვიმერს. თუმცა, სავარაუდოდ, მათ მეგობრების ერთ ჩვეულებრივ სერიაში ვერ ვიხილავთ: მათი შეხვედრა სცენარის გარეშე წარიმართება და მეტწილად უფრო ინტერვიუებისგან შედგება.

ამას ადასტურებს ის ფაქტიც, რომ ზემოთ ხსენებულ ინტერვიუში სპეცსერიაზე საუბრისას დევიდ შვიმერმა წამყვანი ახსენა:

"არ ვიცი, ამის თქმა თუ შემიძლია. ის არ არის ელენ დეჯენერესი, ის არ არის ბილი კრისტალი. მხოლოდ იმის თქმა შემიძლია, თუ ვინ არ იქნება წამყვანი", — განაცხადა მან.

შოუს ამ ერთგვარ გაგრძელებაზე WarnerMedia მუშაობს და მას ახალ სტრიმინგ სერვისზე — HBO Max-ზე ვიხილავთ. თითოეულ მსახიობს ამ პროექტში მონაწილეობისთვის 2,5-3 მილიონ დოლარს გადაუხდიან, რაც ორჯერ მეტია იმაზე, რასაც მეგობრებში თავდაპირველად მონაწილეობისთვის იღებდნენ.