საქართველოს პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარის, მიხეილ სარჯველაძის განცხადებით ოპოზიცია მხოლოდ იმიტომ გამოთქვამს მოლაპარაკებისთვის მზადყოფნა, რომ "კარგ პოზაში მოეჩვენონ უცხოელ პარტნიორებს".

"მარტო იმიტომ, რომ კარგ პოზაში მოეჩვენონ უცხოელ პარტნიორებს, მხოლოდ ამიტომ აცხადებდნენ, რომ მოლაპარაკებისთვის მზად არიან. როდესაც მოლაპარაკებისთვის მზადყოფნასთან ერთად აყენებ ულტიმატუმს, ის, რასაკვირველია, არ ნიშნავს მოლაპარაკებისთვის მზადყოფნას", — განაცხადა სარჯველაძემ საზოგადოებრივი მაუწყებლის ეთერში.

მისი თქმით, როგგარეშე არჩევნების ჩატარების მოთხოვნას თან უნდა ახლდეს უკვე ჩატარებული არჩევნების გაყალბების დასაბუთება.

"თუკი გულწრფელად ვინმეს მიაჩნია, რომ მოთხოვნა უნდა იყოს დაყენებული ხელახალი არჩევნების ჩატარებასთან დაკავშირებით, რა თქმა უნდა, იგივე მხარემ თავი უნდა შეიწუხოს და ეს გარემოება დაასაბუთოს. სხვაგვარად, დაუსაბუთებლად, მხოლოდ იმის გამო, რომ ვიღაცას სურს, რომ მეორე შანსი შეიძინოს რაც შეიძლება სწრაფად და არ დაელოდოს ამას ოთხი წელი, ეს არ შეიძლება", — აცხადებს მიხეილ სარჯველაძე.

27 თებერვალს, ნაციონალური მოძრაობის თავმჯდომარის, ნიკა მელიას მხარდასაჭერ აქციაზე, სადაც მოქალაქეები მელიას გათავისუფლებასთან ერთად რიგგარეშე არჩევნების დანიშვნას მოითხოვდნენ, ოპოზიციამ უახლოესი ორი კვირის გეგმები გააჟღერა: მოთხოვნების შესრულებისთვის ისინი პარლამენტის, მთავრობის კანცელარიის, შინაგან საქმეთა სამინისტროსა და სასამართლოს პიკეტს გეგმავენ.

გაიგეთ მეტი: