ევროპული საბჭოს პრეზიდენტი შარლ მიშელი საქართველოში ოფიციალური ვიზიტით ჩამოდის. საბჭოს ვებგვერდზე განთავსებული ინფორმაციით, მას დაგეგმილი აქვს შეხვედრები პრემიერმინისტრთან, პრეზიდენტთან, პარლამენტის თავმჯდომარესა და ოპოზიციასთან.

გარდა ამისა, განცახდებაში აღნიშნულია, რომ ის "ადმინისტრაციული საზღვრის ხაზთანაც" ჩავა.

შარლ მიშელს საქართველოს გარდა, დაგეგმილი აქვს ვიზიტი მოლდოვასა და უკრაინაში, რომლებიც 28 თებერვლიდან 3 მარტის ჩათვლით გაიმართება. თავდაპირველად ის მოლდოვაში ჩავა, შემდეგ საქართველოს და უკრაინას ეწვევა. დღის წესრიგში განსახილველ თემებს შორის იქნება ორმხრივი თანამშრომლობა პანდემიის პირობებში და აღმოსავლეთ პარტნიორობის მომავალი.

24 თებერვალს 6-მა ევროპარლამენტარმა მიშელს წერილით მიმართა და საქართველოში ვიზიტამდე, მიმდინარე ბოლოდროინდელ მოვლენებზე რეაგირება მოსთხოვა.

როგორც ერთობლივ წერილშია აღნიშნული, ნაციონალური მოძრაობის ლიდერის, ნიკა მელიას დაკავების შემდეგ, ქართულ ოცნებასა და ოპოზიციას შორის დაპირისპირებამ სახიფათო დონეს მიაღწია. ისინი მოუწოდებდნენ მიშელს, რომ ვიზიტი იმისთვის გამოიყენოს, რომ მხარეებს დიალოგისკენ მოუწოდოს.